चैत्र २२ कञ्चनपुर । कञ्चनपुरको दैजी देखि डडेल्धुराको जोगबुढा जोड्ने सडक निर्माणको काम सुस्त गतिमा अघि बढेको छ ।
तीन वर्ष अघि २१ करोडमा ठेक्का भएको उक्त सडकको निर्माणको काम सुस्त गतिमा अघि बढेको हो । एसियाली विकास बैंकको अनुदानमा गत वर्षबाट निर्माण थालिएको सडकको् अहिले सम्म नौ किलोमिटर मात्रै सडक कालोपत्र भएको छ ।
महेन्द्रनगरस्थित पूर्वाधार विकास कार्यालयका प्रमुख दीपक नेगीले गत वर्ष पुषमा शिलान्यास भई निर्माणको काम अघि बढेको भए पनि सडक निर्माणको कार्यले गति लिन नसकेको स्विकार गर्दै दुई पटक आएको वर्षातका कारण पहिरा जाँदा बनेका संरचना भत्किनाका साथै लाखौँको क्षति पुगे पछि काममा ढिलाइ भएको बताए । उनले लिप्नासम्म १७ किलोमिटर भए पनि १६ किलोमिटर सडक कालोपत्रे गर्न सुरु गरेको जानकारी गराउदै भत्केको संरचना बनाउन भेरियशनका लागि मन्त्रालय पठाए पनि स्वीकृति नहुँदा काममा ढिलाइ भएको बताए । केही समय निर्माण कम्पनीले भत्केका संरचना बनाउन अग्रसरता देखाए पनि झन्डै एक महिनायता सडक निर्माणको काम रोकिएको उनको जानकारी
गराए । दोस्रो पटक म्याद थप गर्दा पनि काम हुन नसकेको बताउदै उनले यही चैत मसान्तमा ठेक्का अवधि सकिन लागेको जानकारी गराए ।
केन्द्र सरकारको ससर्त अनुदानबाट सडक बनाउन लागिए पनि त्यसको कार्यान्वयन भने प्रदेश सरकारको जिम्मा भएको बताउदै उनले दैजी देखि डडेल्धुराको जोगबुढा सीमा नाकासम्म २२ किलोमिटर दुरी रहेको जानकारी गराए । वेदकोट ताल क्षेत्रसम्म सडकको अवस्था ठीक भए पनि त्यस भन्दा माथिल्लो क्षेत्रमा भने वर्षाका कारण धेरै ठाउँमा क्षति भएको बताउदै उनले डडेल्धुराको परशुराम नगरपालिका जोगबुढा क्षेत्रमा पनि सडक निर्माणको गति सुस्त भएको बताए ।
महेन्द्रनगरदेखि अत्तरिया हुँदै डडेल्धुराको दूरी १ सय ६५ किलोमिटर रुहेको छ भने दैजी–जोगबुढा हुँदै डडेल्धुरा सम्मको सडकको दुरी करिब ६५ किलोमिटर कम रहेको उनले जानकारी गराए । त्यसैगरी पूर्वाधार विकास कार्यालय डडेल्धुराका प्रमुख श्यामबहादुर खड्काले कञ्चनपुर–डडेल्धुराको सीमाना लिप्ना देखि १७ किलोमिटर सडक निर्माणाधीन अवस्थामा रहेको जानकारी गराउदै भर्खरै चार किलोमिटर सडक कालोपत्रे भएको बताउनु भयो । उनले १७ किलोमिटर सडकलाई दुईवटा प्याकेजमा निर्माणको जिम्मा दिइएको जानकारी गराउदै गत कात्तिकमा आएको वर्षाले सडकमा क्षति पु¥याएको जानकारी गराए ।