फागुन ०३ अछाम । वैवाहिक बलात्कारको कसूरमा उच्च अदालत दिपायलले अछामका एक जना पुरुषलाई ३ बर्ष ६ महिना कैद सजायको फैसला सुनाएको छ । विवाहित गर्भवती श्रीमतीलाई कुटपिट र यातना दिई जबरजस्ती करणी समेत गरेको ठहर गर्दै उच्च अदालत दिपायलका कामुमुख्य न्यायाधीश टेकनारायण कुँवर र न्यायाधीश जगत बहादुर थापाको इजलासले उक्त फैसला सुनाएको हो । बहुविवाह गरे पछि प्रहरीमा जाहेरी दिई कारवाही गराएको भनि प्रतिवादीले विवाहित गर्भवती श्रीमतीलाई कुटपिट र यातना दिई जबरजस्ती करणी गरेको आरोप लगाईएको छ ।
उक्त मुद्दामा बहुविवाहको मुद्दामा छुटेर आए पछि नाम परिबर्तन श्यामले श्रीमतीलाई कुटपिट गर्ने गरेको पाईएको बताइएको छ । २०७७ असोज ६ गते जबरजस्ती करणी गरेको भन्दै पीडितले उजुरी दिए पछि जिल्ला प्रहरी कार्यालय अछामले मुद्दाको अनुसन्धान गरेको बताईएको छ ।
पीडितको शारीरिक परीक्षण गर्दा गर्धन र दायाँ कुमतर्फ चोट पटक लागेको देखिएको बताईएको छ । पीडितले अदालतमा बकपत्र गर्दा समेत जाहेरी अनुसार बेहोरा लेखाएको र प्रतिवादीले भने सहमतिमा करणी गरेको भनि बयान दिएको बताईएको छ ।
पीडितले आफूमाथि जबरजस्ती करणी भए पछि छिमेकीलाई गुहारी आफूमाथि भएको अन्यायको बेहोरा सुनाएको र सोही कुरा साक्षीहरूले अदालतमा ब्यक्त गरेको बताईएको छ । तर जिल्ला अदालतले भने पीडितले जबरजस्ती करणी गरेको भन्ने बेहोराको बकपत्र गरेको भएता पनि जबरजस्ती करणीको कसूर स्थापित हुने प्रमाण नरहेको भनि सफाई दिएको थियो ।
सोमबार भने उच्च अदालत दिपायलले जिल्ला अदालतको फैसला उल्ट्याउँदै गर्भवती श्रीमतीलाई बहुविवाहको उजूरी दिएको रिसको झोँकमा निर्मम तरिकाले कुटपिट गरी यातना दिई जबरजस्ती करणी गरेकोमा दोषी ठहर गर्दै यो सजाय सुनाएको हो ।
विद्यमान कानून अनुसार एउटा कसुर गरी सजाय पाएकोमा कुनै व्यक्तिले पुनः अर्को कसुर गरेमा पछिल्लो पटक गरेको सजायको दोब्बर सम्म थप सजाय हुने भएकोले यस मुद्दामा ३ बर्ष ६ महिना कैद तोकिएको फैसलामा उल्लेख गरिएको छ ।
