बैशाख २८ बैतडी । बैतडीका दर्जनौँ सरकारी भवन प्रयोगविहीन अवस्थामा रहेका छन् । सुकुमवासीका लागि भनेर सरकारले निर्माण गरेका जनता आवासका घर लगायतका कतिपय सरकारी भवन प्रयोगविहीन अवस्था रहेका छन् । सुदूरपश्चिम प्रदेश सरकारले निर्माण गरेका करिब ५० वटा सरकारी संरचना प्रयोगविहीन रहेको जिल्ला समन्वय समितिका प्रमुख खगेन्द्रसिंह धामीले बताए । प्रदेश सरकार गठन हुनु अघि बनेको संरचना पनि प्रयोगविहीन रहेको उनले बताए । सिगास गाउँपालिकाको गाँजरी इलाका सेवा कार्यालयको भवन १० वर्षदेखि प्रयोगविहीन अवस्था रहेको छ ।
त्यसैगरी सदरमुकामको वृद्धाश्रम, महिला सुरक्षित आवासगृह पनि प्रयोविहीन अबश्थामा रहेका छन । पाटन नगरपालिकामा मात्रै १४ वटा भन्दा बढी सरकारी संरचना प्रयोगविहीन रहेको जिल्ला समन्वय समितिका सदस्य प्रेम भाटले बताए । अनुगमनका क्रममा पाटन नमुना सहरको मनोरञ्जन पार्कका भवन र संचरना, सभा हल, ट्रमा सेन्टर, सहरी स्वास्थ्य क्लिनिक, तरकारी सङ्कलन केन्द्र, चिस्यान केन्द्र लगायतका संरचना प्रयोगविहीन रहेको उनले बताए । पछल्लो समय बैतडीका १ सय १४ वटा सरकारी विद्यालय बन्द हुने अवस्था आएपछि ती भवन समेत खाली भएको उनले बताए ।
अधिकांश स्थानीय तहले विद्यालय एकीकरण गरेपछि सरकारी लगानीमा बनेका दर्जनौँ विद्यालयका भौतिक संरचना प्रयोगविहीन बनेको बताए । पुर्चौडी नगरपालिका वडा नम्बर–७, ऐराडीगाउँमा रहेको लटीनाथ आधारभूत विद्यालय बन्द भएपछि तीन वटा भवन प्रयोगविहीन बनेका छन् । उक्त गाउँको दलित बस्तीका अधिकांश अभिभावक रोजगारीको खोजीमा बालबच्चा सहित भारतका बैङ्लुरु, पिथौरागढ लगायतका सहर पसेपछि विद्यालय पूर्ण रूपमा बन्द भएको सोही गाउँका शिक्षक दिनेश नागारीले बताए ।
अलपत्र परेका अधिकांश भवन बिनाउद्देश्य बजेट सक्नकै लागि बनेको जिल्ला समन्वय समितिका प्रमुख खगेन्द्रसिंह धामीले बताए । राजनीतिक पहुँचका भरमा बजेट ल्याएर राज्यको सम्पत्ति सक्ने काम मात्रै भएको देखिएको उनले बताए । जिल्ला समन्वय समितिले अनुगमन गरेर प्रदेशका ५० वटा भवनबारे छानबिन गर्न अनुरोध गरे पनि कुनै सुनुवाइ नभएको उनले बताए । सरकारी लगानीमा जिल्लाभर निर्माण भएर अलपत्र परेका प्रसूतिगृहका भवन, क्याम्पस र स्वास्थ्य संस्थाका भवन प्रयोगमा नआएको उनले बताए ।
त्यसैगरी बैतडीका प्रमुख जिल्ला अधिकारी डा. डिजन भट्टराईले प्रयोगमा नआएर अलपत्र परेका भवनको खोजी कार्य सुरु गरिने बताएका छन । मनसुनका बेला सुकुमवासी र अव्यवस्थित बसोबासी बढी प्रभावित हुने भएकाले खाली भवनको उपयोगिताबारे छलफल गर्ने उनले बताए । गाउँपालिका तथा नगरपालिकाले सङ्कलन गरेको तथ्याङ्क अनुसार बैतडीमा तीन हजारको हाराहारीमा अव्यवस्थित बसोबासी तथा सुकुमवासी रहेका छन् ।
विघटित भूमि समस्या समाधान अयोगको जिल्ला कार्यालयका निवर्तमान अध्यक्ष रमेशप्रसाद पाण्डेयले कतिपय सुकुमवासी सडक किनारमा टहरा बनाएर बसेको बताए । जिल्ला विपत् व्यवस्थापन समितिले अलपत्र रहेका सरकारी भवन खोजी गरेर मनसुन अघि त्यस्ता बसोबासीलाई राख्न सकिने बताए । स्थानीय तहको सरकारले पनि सरकारी लगानीमा बनेका प्रयोगविहीन भवनको लगत सङ्कलन गर्नुपर्ने सरोकारवालाले बताएका छन ।
