बैशाख २३ कञ्चनपुर । कञ्चनपुरको शुक्लाफाँटा नगरपालिका वडा नम्बर–१० अमरपुरस्थित शुक्लाफाँटा बहुप्राविधिक शिक्षालयमा निर्धारित कोटा भन्दा कम विद्यार्थी भर्ना भएपछि केही विषयको पठन पाठन प्रभावित भएको छ ।
प्राविधिक शिक्षा तथा व्यावसायिक तालिम परिषद् (सिटिइभिटी) अन्तर्गत सञ्चालित उक्त शिक्षालयमा अटोमोबाइल विषयमा एक जना पनि विद्यार्थी भर्ना नभए पछि उक्त विषयको पढाइ पूर्ण रूपमा बन्द भएको छ ।
मेकानिकल इन्जिनियरिङतर्फ २४ जनाको कोटा भए पनि तीनै वर्षमा गरी जम्मा १५ विद्यार्थी मात्र अध्ययनरत रहेका छन् । त्यसैगरी सिभिल इन्जिनियरिङमा ४८ जनाको कोटा रहे पनि पहिलो वर्षमा १८ जना विद्यार्थी मात्रै भर्ना भएका छन् भने डिप्लोमा इन फार्मेसीमा ४० जनाको कोटा पूरा भएको छ । अन्य विषयमा भने विद्यार्थी आकर्षण न्यून देखिएको छ । शिक्षालयका अनुसार एसइई उत्तीर्ण गरेपछि धेरैजसो विद्यार्थी उच्च शिक्षा अध्ययनका लागि विदेश जाने प्रवृत्तिले स्थानीय शिक्षालयमा विद्यार्थी अभाव भएको हो ।
फार्मेसी कार्यक्रमका संयोजक ललितमोहन कलौनीले निःशुल्क शिक्षा, आवास सुविधा तथा यातायात खर्च उपलब्ध गराउँदा पनि विद्यार्थीको आकर्षण बढ्न नसकेको बताए । शिक्षालयमा भौतिक पूर्वाधारको अवस्था पनि कमजोर रहेको छ । निमित्त शिक्षालय प्रमुख अञ्जन सापकोटाका अनुसार हाल ११ कोठे एउटा मात्र भवनबाट सम्पूर्ण गतिविधि सञ्चालन भइरहेको छ ।
पर्याप्त कोठा अभावका कारण एउटै कक्षमा पुस्तकालय, कम्प्युटर ल्याब र कार्यालय सञ्चालन गर्नुपर्ने बाध्यता रहेको उनले बताए । शिक्षालयमा छात्रावास, क्यान्टिन, साइकल स्ट्यान्ड तथा घेरपर्खालको समेत अभाव रहेको छ । साथै, सनवोरा नदीबाट शिक्षालयको जग्गा कटान भइरहेको भए पनि त्यसको नियन्त्रणका लागि प्रभावकारी पहल हुन सकेको छैन ।
२२ जना शिक्षक तथा कर्मचारी कार्यरत रहेको यस शिक्षालयको विकासका लागि एक अर्ब रुपैयाँभन्दा बढीको विस्तृत परियोजना प्रतिवेदन (डीपीआर) तयार पारिएको भए पनि हालसम्म कार्यान्वयन हुन सकेको छैन । विद्यार्थी अभाव र कमजोर पूर्वाधारका कारण गाउँमै प्राविधिक जनशक्ति उत्पादन गर्ने सरकारी लक्ष्यमा चुनौती थपिएको सरोकारवालाहरूले बताएका छन ।
