भदौ ०८ बाजुरा । धार्मिक तथा पर्यटकीय क्षेत्र बडीमालिकामा फोरजी सेवा सञ्चालनमा आएको छ । नेपाल टेलिकमले बडीमालिकाको लौडीविनायकमा टावर निर्माण तथा जडान कार्य सम्पन्न गरेसँगै सोमबार देखि फोरजी सेवा सञ्चालनमा आएको हो ।
नेपाल टेलिकम बाजुराका प्रमुख इन्जिनियर ईश्वर सिंहका अनुसार लौडीविनायकमा टावर निर्माण तथा जडान कार्य सम्पन्न भएपछि फोरजी सेवा सञ्चालन गरिएको हो । टावर जडानका लागि भदौ ३ गते टेलिकमका प्राविधिक टोली बडीमालिका पुगेको थियो ।
भौगोलिक विकटता तथा सडक सञ्जालको अभावका कारण टावरका उपकरण स्थलमार्गबाट ढुवानी गर्न कठिन भएपछि साउन २६ गते हेलिकप्टर मार्फत उपकरण तथा सामग्री बडीमालिकाको त्रिवेणी पाटनमा पु¥याइएको थियो ।
त्यसपछि त्रिवेणी पाटनबाट जडानस्थलसम्म करिब चार हजार किलोग्राम उपकरण तथा अन्य सामग्री जनशक्ति मार्फत बोकेर पु¥याइएको थियो । सामग्री ढुवानीका लागि बडीमालिका नगरपालिकाले समेत टोली परिचालन गरेको थियो ।
यसअघि सञ्चारमन्त्री डा. विक्रम तिमिल्सिनाले नेपाल टेलिकमलाई बडीमालिका क्षेत्रमा टेलिफोन तथा इन्टरनेट सेवा विस्तारका लागि आवश्यक प्रक्रिया तत्काल अघि बढाउन निर्देशन दिएका थिए । समुद्री सतहबाट करिब चार हजार दुई सय मिटर उचाइमा रहेको बडीमालिकामा हरेक वर्ष हजारौँ दर्शनार्थी तथा पर्यटक पुग्ने गरेका छन् ।
सञ्चार सेवा उपलब्ध नहुँदा तीर्थयात्री, स्थानीय तथा सुरक्षाकर्मीले मोबाइल सम्पर्क र इन्टरनेट प्रयोगमा समस्या भोग्दै आएका थिए । फोरजी सेवा सञ्चालन भएपछि बडीमालिका पुग्ने भक्तजन तथा पर्यटकलाई परिवारसँग सम्पर्क गर्न, सूचना आदान–प्रदान गर्न र इन्टरनेट प्रयोग गर्न सहज हुने बडीमालिका नगरपालिकाका नगरप्रमुख अमरबहादुर खड्काले बताए ।
आपत्कालीन अवस्थामा उद्धार तथा सुरक्षा निकायसँग सम्पर्क गर्नसमेत फोरजी सेवाले महत्वपूर्ण सहयोग पु¥याउने उनले बताए । प्रमुख जिल्ला अधिकारी डोरेन्द्र निरौलाले बडीमालिका मेला अगावै फोरजी सेवा सञ्चालनमा आएकाले मेलामा पुग्ने भक्तजनलाई सूचना तथा सञ्चारका क्षेत्रमा ठूलो सहजता हुने बताए ।
यस वर्ष बडीमालिकामा मुख्य पूजा भदौ ११ गते हुने बताउदै उनले मुख्य पूजा भदौ ११ गतेका दिन भक्तजनको बढ्दो चापलाई मध्यनजर गर्दै भदौ १ गतेदेखि नै पूजा सुरु गरिएको बताए । पूजाका लागि सोमबार बडीमालिका नगरपालिकाका नगरप्रमुख अमरबहादुर खड्का, उपप्रमुख नन्दा थापा, जिल्ला प्रहरी प्रमुख डीएसपी शैलेश्वरी बोहरा सहितको सरकारी टोली बडीमालिकातर्फ प्रस्थान गरेको छ ।
डोटी, जुम्ला, कालिकोट तथा कैलालीको धनगढी उपमहानगर पालिकाको सरकारी टोली समेत यसअघि नै बडीमालिका पुगिसकेको छ । सुदूरपश्चिम प्रदेश सरकारले पनि पूजा सामग्री सहित आइतबार सरकारी टोली बडीमालिका पठाएको छ ।
बडीमालिका, बुढीनन्दा लगायत बाजुराका दर्जन भन्दा बढी धार्मिक शक्तिपीठमा हरेक वर्ष जनैपूर्णिमाको अघिल्लो दिन अर्थात् साउन शुक्ल चतुर्दशीका दिन मुख्य पूजा हुने परम्परा छ । मनोकांक्षा पूरा हुने तथा मागेको वर प्राप्त हुने धार्मिक विश्वासका कारण यी क्षेत्रमा ठूलो संख्यामा भक्तजन पुग्ने गरेका छन् ।
दुर्गम तथा पर्यटकीय क्षेत्रमा दूरसञ्चार सेवाको पहुँच विस्तारलाई प्राथमिकता दिँदै आएको नेपाल टेलिकमले बडीमालिकामा फोरजी सेवा सञ्चालनमा ल्याएसँगै यस क्षेत्रको डिजिटल पहुँच समेत विस्तार हुने अपेक्षा गरिएको छ ।
