बैशाख ०३ धनगढी । कैलालीको धनगढी विमानस्थल विस्तारको योजना अलपत्र परेको छ । २०७८ सालमा नेपाल नागरिक उड्डयन प्राधिकरणले विमानस्थल विस्तार गर्न अगाडी सारेको योजना अलपत्र परेको हो । तीन वर्षअघि धनगढी विमानस्थल विस्तारको विषय चर्चामा आए पनि अहिले भने सुस्ताएको छ ।
२०७८ पुस ११ गते तत्कालीन संस्कृति, पर्यटन तथा नागरिक उड्डयनमन्त्री प्रेमबहादुर आलेको अध्यक्षतामा बसेको बैठकले धनगढी विमानस्थलको विस्तार गर्न एक अर्ब रुपैयाँको बजेट विनियोजन गर्ने निर्णय गरेको थियो । त्यो बेला धनगढीलाई क्षेत्रीय विमानस्थलका रूपमा विकास गर्न २ सय ५० बिघा जमिन अधिग्रहण गरेर एक हजार आठ सय मिटरको धावनमार्गलाई बढाएर दुई हजार पाँच सय मिटरको बनाउने भनिएको थियो ।
स्रोत सुनिश्चित नगरी त्यो बेला बजेट विनियोजन गरिएको थियो । एक अर्ब बजेटको हवाला दिएर तत्कालीन मन्त्रीले चर्चा कमाउन मात्रै खोजेकाले विमानस्थल विस्तारको योजना अलपत्र परेको बताइएको छ । धनगढी विमानस्थल विस्तारको कुनै काम अगाडी नबढेको विमानस्थल प्रमुख गणेशबहादुर सिंहले बताए ।
दुई वर्षयता सरकारले धनगढी विमानस्थल विस्तार गर्न बजेट विनियोजन गरेको छैन । धनगढी विमानस्थल निर्माण तथा विमानस्थल विस्तारका लागि अध्ययन अनुसन्धान गर्ने नाममा तीन वर्ष अगाडी भ्रमण गर्नेबाहेक अन्य उपलब्धि भएको छैन । आर्थिक वर्ष २०७७÷७८ मा नागरिक उड्डयन प्राधिकरणले बनाएको गुरुयोजना मन्त्रीपरिषद्ले पास गरे पनि बजेट भने विनियोजन गरिएको थिएन ।
तत्कालीन पर्यटन मन्त्री आले अध्यक्ष रहेको उड्डयन प्राधिकरण बोर्डले २०७७ पुस ११ गते गुरुयोजना स्वीकृत गर्नेबाहेक अन्य थप काम अगाडी बढेको छैन । तीन वर्षअघि विमानस्थल विस्तारका लागि स्थानीयको जग्गा अधिग्रहण गर्न १५ देखि १६ अर्ब लाग्ने अनुमान गरिएको थियो ।
यसअघि एक अर्ब छुट्याएको भनिएको बजेटको पनि स्रोत सुनिश्चित नभए पछि जग्गा अधिग्रहणको काम अघि बढ्न नसके पछि विमानस्थल विस्तारको चर्चा समेत सेलाएको छ । विमानस्थल विस्तारको काम गर्न जग्गाको मुआब्जा दिनुपर्ने भए पनि हाललाई सबै काम स्थगन गरिएको विमानस्थल कार्यालयले जानकारी गराएको छ ।
२०७८ को अन्तिमतिर रियल पाथ इन्जिनियरिङ नामक कन्सल्टेन्सीले विमानस्थल विस्तारका लागि जग्गा नापजाँचको काम गरेको थियो ।
४५ मिटर चौडाइको दुई हजार ५ सय ५० मिटर लामो धावनमार्ग, अत्याधुनिक टर्मिनल भवन, पार्किङ एप्रोन, ह्याङ्गर, हेलिप्याड, कार्गो भवन, फ्युल स्टेसन, फायर फाइटिङ स्टेसन र उद्धार, चव्रmपथ सहितका पूर्वाधार निर्माणको विषय गुरुयोजनामा छ ।
विमानस्थललाई क्षेत्रीयस्तरको बनाउन थप २ सय ५८.२५ बिघा जमिन आवश्यक पर्ने भए पनि अहिले आएर विमानस्थल विस्तारको योजना अलपत्र परेको छ ।
