माघ ४ धनगढी
सुदूरपश्चिम प्रदेशका मुख्यमन्त्री त्रिलोचन भट्टले लगानीमा एकरुपता नहुँदा लगानी मैत्री वातावरण बन्न नसकेको बताउनु भएको छ ।
गैरआवसीय नेपाली सङ्घ (एनआरएन)का अध्यक्ष सहितका पदाधिकारीको सहभागितामा मंगलबार धनगढीमा भएको अन्तरक्रियामा मुख्यमन्त्री भट्टले लगानीमा एकरुपता नभएकाले लगानी मैत्री वातावरण बन्न नसकेको बताउनु भएको हो । मुख्यमन्त्री भट्टले जग्गाको सहज उपलब्धता सँगै सुरक्षाको प्रत्याभूति र कानुनमा देखिने झमेलाको सहजीकरण गर्न सके लगानी मैत्री वातावरण बन्ने बताउनु भयो ।
प्रदेशमा पर्यटन, कृषि, ऊर्जा, उद्योग लगायतका क्षेत्रमा लगानी गर्न सकिने सम्भावना रहेको बताउदै मुख्यमन्त्री भट्टले प्रदेशमा अहिलेसम्म कसैले पनि लगानी नगरेको बताउनु भयो । लगानीमैत्री वातावरण सिर्जना गर्न प्रदेश सरकार प्रतिबद्ध रहेको बताउदै मुख्यमन्त्रीले अहिलेसम्म नेपाल र सुदूरपश्चिम प्रदेशमा गरिएको सहयोग प्रति एनआरएनलाई धन्यवाद दिनु भयो ।
आर्थिक मामिलामन्त्री तारालामा तामाङ र भौतिक पूर्वाधार विकास मन्त्री दीर्घबहादुर सोडारीले प्रदेशको समग्र विकासका लागि एनआरएनबाट भूमिका निर्वाह भइरहने विश्वास व्यक्तगर्नु भयो ।
एनआरएनका अध्यक्ष कुमार पन्तले विदेशमा बसेर प्राप्त भएको ज्ञान सीपलाई आफ्नै देशको समृद्धिका लागि प्रयोग गर्ने सोच संस्थाको रहेको बताउदै नेपालमा कोभिड–१९ को समस्या आउँदा सबै भन्दा पहिले एनआरएनले नै सहयोग सामग्री पठाएको बताए ।
एनआरएनको पहलमा नेपालमा दश अर्ब रुपैयाँ लागानीका लागि प्रयास भइरहेको उनले जानकारी गराए । विदेशमा रहेका नेपालीको संस्था एनआरएनले नेपालमा भूकम्प, कोभिड–१९ जस्ता विपत्तिको समयमा विभिन्न सहयोग उपलब्ध गराउँदै आएको छ ।
संस्थाले नेपालमा कोरोना भाइरसका सङ्क्रमितको उपचार व्यवस्थापनका लागि प्रयोगमा आउने अक्सिजन प्लान्ट, अक्सिजन कन्सन्टेटर लगायत सामग्रीको सहयोग गरेको छ ।