जेठ १८ धनगढी । कैलालीको गौरीगङ्गा नगरपालिका वडा नम्बर–४ राजिपुरस्थित बझाङ्गी टोलमा जुवातास खेलिरहेको अवस्थामा प्रहरीले नगद सहित ९ जनालाई पक्राउ गरेको छ ।
यही जेठ १७ गते साँझ करिब साँढे ६ बजेको समयमा विशेष सूचनाको आधारमा जिल्ला प्रहरी कार्यालय कैलाली, इलाका प्रहरी कार्यालय मालाखेती, इलाका प्रहरी कार्यालय चौमाला तथा अस्थायी प्रहरी पोष्ट राजिपुरबाट संयुक्त रूपमा खटिएको १९ जनाको प्रहरी टोलीले नगद सहित ९ जनालाई पक्राउ गरेको ेहो ।
प्रहरीका अनुसार गौरीगङ्गा नगरपालीका वडा नम्बर–४ राजिपुरस्थित स्थानीय जगत धामीको दुई तले पक्की घरको माथिल्लो तलाको बैठक कोठामा जुवातास खेलिरहेको अवस्थामा प्रहरीले उनीहरूलाई पक्राउ गरेको हो ।
प्रहरीले नगद १ लाख ७९ हजार २० रुपैया, चार गड्डी तास र ८ थान मोबाइल फोन बरामद गरेको जानकारी गराएको हो । जगत धामी, कृष्ण गुर्धामी, खेमराज पोखरेल , शंकर धामी , गोपाल साउँद , प्रकाश भुल , जयबहादुर बोहरा, तेजबहादुर बोगटी र कालु सिंह धामीलाई प्रहरीले पक्राउ गरेको हो ।
जिल्ला प्रहरी कार्यालय कैलालीका सूचना अधिकृत योगेन्द्र तिमल्सिनाले उनीहरूलाई आवश्यक कारबाहीका लागि इलाका प्रहरी कार्यालय मालाखेतीमा बुझाइएकोे जानकारी गराए । प्रहरीका अनुसार उक्त स्थान अस्थायी प्रहरी पोष्ट राजिपुरबाट करिब ३ किलोमिटर पश्चिम–उत्तरतर्फ रहेको छ ।
