जेठ १८ धनगढी । कैलाली र कञ्चनपुरका विभिन्न स्थानबाट प्रहरीले भन्सार छलिका सामान बरामद गरेको छ ।
जिल्ला प्रहरी कार्यालय कञ्चनपुरका अनुसार भीमदत्त नगरपालिका वडा नम्बर–४ बसपार्क तथा दोधाराचाँदनी नगरपालिका वडा नम्बर–३ न्याउलीघाट क्षेत्रबाट भारतबाट अवैध रूपमा भन्सार छलि गरी ल्याइएका अन्दाजी २ लाख ३५ हजार १ सय रुपैयाँ बराबरका तरकारी, कुरकुरे, पेय पदार्थ, पापड, माछा तथा एक थान मोटरसाइकल लगायतका सामान प्रहरीले बरामद गरेको हो ।
आइतबार जिल्ला प्रहरी कार्यालय कञ्चनपुर तथा मातहत कार्यालयबाट खटिएको प्रहरी टोलीले उक्त सामान बेवारिसे अवस्थामा फेला पारी आवश्यक प्रक्रिया पूरा गरी बरामद गरेको हो । त्यसैगरी, कैलालीको धनगढी उपमहानगरपालिका वडा नम्बर–२ भन्सार कार्यालय नजिकबाट अन्दाजी ३१ हजार ३ सय ५० रुपैयाँ बराबरका चिनी, खाने तेल, ग्यास लाइटर, साडी, सुटपिस तथा किराना सामान बरामद गरिएको प्रहरीले जनाएको छ ।
प्रहरी चौकी त्रिनगरबाट खटिएको टोलीले उक्त सामान बेवारिसे अवस्थामा फेला पारी आवश्यक प्रक्रिया पूरा गरी बरामद गरेको हो ।
