फागुन २२ तनहुँ । प्रतिनिधिसभा सदस्य निर्वाचन अन्तर्गत तनहुँ निर्वाचन क्षेत्र नम्बर १ मा राष्ट्रिय स्वतन्त्र पार्टी रास्वपाका उपसभापति डाः स्वर्णिम वाग्ले विजयी भएका छन् । मुख्य निर्वाचन अधिकृत विष्णुप्रसाद उपाध्यायका अनुसार शनिबार बिहान सम्पन्न मतगणनामा वाग्लेले ३८ हजार ४० मत प्राप्त गर्दै जित हात पारेका हुन् । उनका निकटतम प्रतिस्पर्धी नेपाली कांग्रेसका गोविन्द भट्टराईले १६ हजार २ सय ३१ मत प्राप्त गरेर विजयी भएका हुन ।
त्यसैगरी नेकपा एमालेकी भगवती न्यौपानेले ५ हजार ८ सय ३० मत र नेपाल कम्युनिष्ट पार्टीका विद्यानाथ ढकालले २ हजार ३ सय ९३ मत पाएकी छिन । यस निर्वाचन क्षेत्रमा कुल १ लाख २६ हजार ८ सय ८२ मतदाता रहेकामा ६८ हजार १ सय २९ मत खसेको थियो । वाग्ले तनहुँ–१ बाट दोस्रो पटक प्रतिनिधिसभा सदस्यमा निर्वाचित भएका हुन् ।
यसअघि विसं २०८० वैशाख १० गते भएको उपनिर्वाचनमा पनि उनले ३४ हजार ९ सय ११ मत प्राप्त गर्दै जित हासिल गरेका थिए । त्यतिबेला पनि उनका प्रमुख प्रतिस्पर्धी नेपाली कांग्रेसका गोविन्द भट्टराई थिए, जसले २० हजार १ सय २२ मत पाएका थिए । विसं २०३१ सालमा गोरखाको बुङ्कोटमा जन्मिएका डाः वाग्ले एक चर्चित अर्थशास्त्री, नीतिविज्ञ तथा राजनीतिज्ञ हुन् ।
उनले राष्ट्रिय योजना आयोगका सदस्य र उपाध्यक्षका रूपमा काम गरिसकेका छन् । साथै, उनीसँग संयुक्त राष्ट्रसंघीय विकास कार्यक्रम (यूएनडीपी) को एशिया–प्रशान्त क्षेत्रका प्रमुख आर्थिक सल्लाहकारको अनुभव पनि छ ।
लण्डन स्कुल अफ इकोनमिक्स, हार्वर्ड विश्वविद्यालय र अष्ट्रेलियन नेशनल विश्वविद्यालयबाट उच्च शिक्षा हासिल गरेका वाग्ले विसं २०७१ मा नेपाल फर्किएका थिए । आर्थिक नीति, विकास योजना र सार्वजनिक नीतिमा उनको गहिरो अध्ययन र अनुभव रहेको मानिन्छ ।
