भदौ १९ धनगढी । कैलालीको चुरे गाउँपालिकामा सामाजिक मनोपरामर्शकर्ता पदका लागि गरिएको कर्मचारी छनौट प्रक्रियामा ढिलो आएका उम्मेद्वारलाई अतिरिक्त समय दिईएको आरोप लागेको छ ।
निर्धारित समय भन्दा परीक्षा हलमा ढिलो पुगेका उम्मेदवारलाई अतिरिक्त समय दिइएको र उनीहरू मध्ये एक जनालाई नियुक्तिका लागि सिफारिस गरिएको आरोप लागेको हो ।
परीक्षामा सहभागी अन्य उम्मेदवारले छनौट प्रक्रियाको निष्पक्षतामाथि प्रश्न उठाउदै विरोध गरेका छन । गाउँपालिकाले सामाजिक मनोपरामर्शकर्ता पदका लागि गरेको विज्ञापनमा आठ जनाले आवेदन दिएका थिए ।
भदौ १७ गते बिहान ११ बजे लिखित परीक्षा सञ्चालन गर्ने समय तोकिएको थियो । परीक्षामा सहभागी एक जना उम्मेदवारका अनुसार निर्धारित समयमा छ जना मात्र परीक्षा केन्द्रमा उपस्थित भएका थिए ।
बाँकी दुई जनालाई कुरेर करिब २० मिनेट पछि परीक्षा सुरु गरिएको उनको दाबी छ । परीक्षा सुरु भएको करिब ३० मिनेट पछि दुई जना उम्मेदवार परीक्षा हलमा पुगेको उनले बताए । उनका अनुसार लिखित परीक्षाका लागि ४५ मिनेट समय निर्धारण गरिएको थियो ।
समयमै परीक्षा दिएका छ जना उम्मेदवारलाई दिउँसो १२ः०५ बजे परीक्षा हलबाट बाहिर पठाइएको थियो । ढिलो आएका दुईमध्ये एक जना आफैँ परीक्षा हलबाट बाहिरिए पनि अर्का एक जना उम्मेदवारलाई भने साढे १२ बजेसम्म परीक्षा दिन दिइएको सहभागीले आरोप लगाएका छन ।
बुधबार प्रकाशित लिखित परीक्षाको नतिजा अनुसार आयुष्मा रावत पहिलो, पवित्रा पौडेल दोस्रो र पार्वती चौधरी तेस्रो स्थानमा सफल भएका थिए । सोही दिन अन्तर्वार्ता समेत सम्पन्न गरिएको थियो । अन्तर्वार्ता पछि पार्वती चौधरीलाई नियुक्तिका लागि सिफारिस गरिएको र पवित्रा पौडेललाई वैकल्पिक उम्मेदवारका रूपमा राखिएको जनाइएको छ ।
ढिलो गरी परीक्षा हलमा पुगेका उम्मेदवार मध्ये एक जनालाई नियुक्तिका लागि सिफारिस गरिएको र अर्कीलाई वैकल्पिक उम्मेदवार बनाइएको भन्दै अन्य सहभागीले छनौट प्रक्रियामाथि थप प्रश्न उठाएका छन् । एक जना सहभागीले निश्चित उम्मेदवारलाई लक्षित गरी परीक्षा समय परिवर्तन गरिएको र अतिरिक्त समय दिइएको भए त्यसले परीक्षाको निष्पक्षता प्रभावित हुने बताए ।
“कुनै निश्चित उम्मेदवारका लागि परीक्षा समय सार्नु र अतिरिक्त समय दिनु शंकास्पद विषय भएको उनले बताए । त्यसमाथि सोही व्यक्तिलाई सिफारिस गरिए पछि परीक्षाको निष्पक्षतामाथि गम्भीर प्रश्न उठेको उनले बताए । यो परीक्षा बदर गरेर पुनः निष्पक्ष रूपमा परीक्षा सञ्चालन हुनुपर्ने उनले माग गरेका छन ।
अन्य सहभागीहरूले समेत गाउँपालिकाका कर्मचारीको मिलेमतोमा परीक्षा सञ्चालन तथा नतिजा प्रकाशन गरिएको आरोप लगाएका छन् । उनीहरूले घटनाबारे सम्बन्धित निकायमा उजुरी गर्ने र आवश्यक परे अख्तियार दुरुपयोग अनुसन्धान आयोगसम्म जाने चेतावनी दिएका छन् ।
यता चुरे गाउँपालिकाका सूचना अधिकारी कालीप्रसाद भट्टले भने परीक्षामा कुनै अनियमितता नभएको दाबी गरेका छन् । उनले कुनै व्यक्ति विशेषलाई लक्षित गरी अतिरिक्त समय नदिइएको बताएका छन । हामीले निर्धारित समयमै परीक्षा सञ्चालन गरेका हौँ ।
परीक्षाको व्यवस्थापन र सञ्चालनको जिम्मेवारी केन्द्रा अध्यक्षको थियो,” भट्टले भने, “सबै उम्मेदवारलाई बराबर समय दिइएको हो । कसैका लागि अतिरिक्त समय थपिएको छैन ।
परीक्षा निष्पक्ष ढंगबाट सञ्चालन भएको र योग्य उम्मेदवारलाई नै सिफारिस गरिएको छ । गाउँपालिकाले अनियमितताको आरोप अस्वीकार गरे पनि परीक्षामा सहभागी उम्मेदवारहरूले भने सम्पूर्ण छनौट प्रक्रियाको निष्पक्ष छानबिन गर्न माग गरेका छन् ।
उनीहरूले छानबिनबाट प्रक्रिया त्रुटिपूर्ण देखिए परीक्षा बदर गरी पुनः निष्पक्ष रूपमा परीक्षा सञ्चालन गर्नुपर्ने बताएका छन् । छनौट प्रक्रियामा उठेको विवादले गाउँपालिकाको कर्मचारी भर्ना प्रक्रियामा पारदर्शिता र समान अवसर सुनिश्चित गर्नुपर्ने विषयलाई समेत बहसमा ल्याएको छ ।
