भदौ १९ बैतडी । बैतडीको दशरथचन्द नगरपालिका वडा नम्बर–६ थाचौरकी अस्मिता पन्तले घरमै नेपाली नागरिकताको प्रमाणपत्र प्राप्त गरेकी छिन् । ‘क’ वर्गको अपाङ्गता भएकी १७ वर्षीया पन्तलाई प्रमुख जिल्ला अधिकारी मीना अर्यालले घरमै पुगेर नेपाली नागरिकताको प्रमाणपत्र प्रदान गरेकी हुन् ।
मानसिक अपाङ्गताका कारण अस्मिताले जिल्ला प्रशासन कार्यालय सम्म पुगेर नागरिकता लिन सकेकी थिइनन् । प्रमुख जिल्ला अधिकारी अर्याल सहित जिल्ला प्रशासन कार्यालयका कर्मचारीले बिहीबार घरमै पुगेर सेवा दिएको हो ।
सेवाग्राहीलाई सहज र सरल रूपमा सरकारी सेवा उपलब्ध गराउने उद्देश्यले घरमै पुगेर सेवा प्रदान गरिएको प्रमुख जिल्ला अधिकारी अर्यालले बताइन् । अस्मिताले नागरिकता प्राप्त गरेपछि सरकार र स्थानीय तहबाट अशक्त नागरिकले पाउने सुविधा पाउने छिन् ।
जिल्ला प्रशासन कार्यालयले ‘अशक्तको घरमा प्रमुख जिल्ला अधिकारी कार्यक्रम अन्तर्गत अशक्त तथा अपाङ्गता भएका व्यक्तिलाई घरमै पुगेर नेपाली नागरिकताको प्रमाण पत्र वितरण गर्न थालेको छ ।
दशवटै पालिकाले नागरिकता लिने उमेर पुगेका तर शारीरिक रूपमा अशक्त तथा अपाङ्गताका कारण जिल्ला प्रशासन कार्यालय सम्म पुग्न समस्या भएका व्यक्तिको विवरण सङ्कलन गरिरहेका छन ।
प्रमुख जिल्ला अधिकारी अर्यालले सोही विवरणका आधारमा आवश्यक प्रक्रिया पूरा गरी उनीहरूको ठाउँघरमै पुगेर नागरिकता वितरण गर्दैआएको बताईन ।
