जेठ १७ डडेल्धुरा । सुदूरपश्चिम प्रदेशस्तरीय १६ औँ राष्ट्रपति रनिङ शिल्ड प्रतियोगिताको उपाधि कैलालीले हात पारेको छ । डडेल्धुरामा आयोजित प्रदेशस्तरीय राष्ट्रपति रनिङ शिल्ड प्रतियोगितामा ५८ पदक सहित कैलालीले उपाधि जितेको हो ।
कैलालीले ३२ स्वर्ण, १७ रजत र नौ कास्य पदक जितेको छ । त्यसैगरी, कञ्चनपुर ४३ पदक सहित द्वितीय तथा आयोजक डडेल्धुरा ३० पदक सहित तृतीय स्थान हासिल गर्न सफल भएका छन ।
डडेल्धुराले ६ स्वर्ण, सात रजत र १७ कास्य पदक जितेको छ । त्यसैगरी बैतडी चौथो, दार्चुला पाँचौँ, बझाङ छैटौँ, बाजुरा सातौँ, डोटी आठौँ र अछाम नवौँ स्थानमा रहेका छन । प्रतियोगिताभर कुल २ सय ३२ पदक वितरण गरिएको थियो । जसमा ६६ स्वर्ण, ६६ रजत र १ सय कास्य पदक समावेश गरिएका थिए ।
यही जेठ १४ गतेदेखि सुरु भएको प्रतियोगितामा नौ वटै जिल्लाका खेलाडीबीच एथलेटिक्स, तेक्वान्दो, उस्सु, कराते, भलिबल, कबड्डी लगायतका खेलमा प्रतिस्पर्धा भएको थियो । छनौट प्रतियोगिताबाट उत्कृष्ट प्रदर्शन गर्ने खेलाडीलाई यही वर्ष हुने राष्ट्रपति रनिङ शिल्डका लागि सिफारिस गरिने छ ।
प्रतियोगितामा सुदूरपश्चिम प्रदेशका नौ वटै जिल्लाका खेलाडीले विभिन्न खेल विधामा प्रतिस्पर्धा गरेका थिए । प्रतियोगिताले प्रदेशभरका खेलाडीबीच आपसी सद्भाव, प्रतिस्पर्धात्मक भावना तथा खेल संस्कृतिको विकासमा महत्त्वपूर्ण योगदान पुर्याएको आयोजकले जनाएको छ ।
