माघ १९ दार्चुला । दार्चुलाको अपि हिमाल गाउँपालिका वडा नम्बर–५ स्थित डाँडाबाग आधारभूत विद्यालयमा अध्ययनरत ५२ जना विद्यार्थीलाई न्यानो जकेट तथा जुत्ता वितरण गरिएको छ ।
बडीमालिका फाउण्डेसन नेपालको समन्वयमा लाइन्स क्लब अफ काठमाडौं सुभारम्भ, बच्चा बचत स्मल सेभिङ ब्राइट फ्युचर तथा आउटडोर कम्पासको आर्थिक सहयोगमा न्यानो लुगा वितरण गरिएको हो ।
बडीमालिका फाउण्डेसनका उपाध्यक्ष पदम सिंहले चिसो मौसमका कारण विद्यार्थीको स्वास्थ्य तथा नियमित पठन पाठनमा असर नपरोस् भन्ने उद्देश्यले विद्यालयमै पुगेर सहयोग सामग्री प्रदान गरिएको जानकारी गराए ।
कार्यक्रममा विद्यालयका प्रधानाध्यापक शेरसिंह धामीले दुर्गम क्षेत्रका सामुदायिक विद्यालयका बालबालिकाका लागि यस प्रकारको सहयोग अत्यन्त आवश्यक रहेको बताए । सहयोगी संस्था प्रति धन्यवाद व्यक्त गर्दै उनले यस्ता कार्यक्रमले विद्यार्थीको सिकाइमा सकारात्मक प्रभाव पार्ने बताए ।
विद्यालय व्यवस्थापन समिति अध्यक्ष मानशिंह धामीले दुर्गम विद्यालयलाई लक्षित गरी गरिएको सहयोग प्रति आभार ब्यक्त गर्दै आगामी दिनमा पनि यस्ता सहयोग कार्यक्रम निरन्तर हुने अपेक्षा गरेको बताए ।
कार्यक्रमका सञ्चालक तथा शिक्षिका कमला धामीले सहयोगका कारण विद्यार्थीहरूमा उत्साह थपिएको बताउँदै यसले बालबालिकालाई विद्यालय प्रति आकर्षित गर्न मद्दत पुग्ने बताईन ।
त्यसैगरी लाइन्स क्लब अफ काठमाडौं सुभारम्भका सदस्य तथा समाजसेवी आर के देवु श्रेष्ठले क्लबले शिक्षा, स्वास्थ्य तथा विपद् व्यवस्थापनका क्षेत्रमा निरन्तर सामाजिक सेवा गर्दै आएको जानकारी गराए ।
श्रेष्ठले २०७२ सालको भूकम्प, कोभिड–१९ महामारीका बेला स्वास्थ्य सामग्री वितरण लगायत विभिन्न सामाजिक कार्य गर्दै आएको जानकारी गराए ।
क्लबले प्रत्येक वर्ष कम्तीमा दुई वटा दुर्गम क्षेत्रका सरकारी विद्यालयलाई सहयोग गर्दै आएको बताउदै उनले वर्ष भरी कुनै न कुनै सामाजिक गतिविधिमा संलग्न रहने अभियान क्लबको विशेषता भएकोे बताए ।
कार्यक्रमका सहभागीहरूले कार्यक्रमले दुर्गम क्षेत्रका विद्यार्थीलाई प्रत्यक्ष लाभ पु¥याउनुका साथै सामुदायिक विद्यालय प्रतिको सहयोगी भावना रसामाजिक उत्तरदायित्व बोध गराएको बताएका छन् ।
