माघ १५ धनगढी । प्रतिनिधि सभा निर्वाचनको चुनावी सरगर्मी बढिरहेका बेला कैलालीका किसानलाई चुनाव भन्दा पनि कृषिबालीको चिन्ता लागेको छ । छाडा चौपायाका कारण हिउँदेबाली जोगाउन सकश हुन थालेपछि किसानहरूलाई चुनावी भन्दा पनि कृषिबालीको चिन्ता लागेको हो ।
कैलारी गाउँपालिका वडा नम्बर–७ का कृषक राजकुमार चौधरीले नेताका कुरा र भाषण सुन्नु भन्दा पनि आफ्नै खेतीपाती कसरी जोगाउने भन्ने चिन्ता लागेको बताए । गहुँ, मुसुरो लगायतका हिउँदेबाली पसाउने र दाना लाग्ने समयमा छाडा चौपायाले धेरै नोक्सान गरिरहेकाले कृषिबालीको चिन्ता लाग्ने गरेको उनले बताए ।
गहुँ, मुसुरो जोगाउन रातभर खेतमा जाग्राम बस्ने गरेको बताउदै उनले चुनाव जितेकाले किसानलाई बेवास्ता गर्ने गरेको बताए । चुनाव भन्दा पनि आफ्नै बाली जोगाउने चिन्ता लागेको उनले बताए । कैलालीको कैलारी, भजनी, टीकापुर, लम्कीचुहा, बर्दगोरिया, धनगढी, गोदावरी, गौरीगङ्गा, घोडाघोडी लगायत तराईका सबै पालिकामा छाडा चौपायाको समस्या छ ।
छाडा चौपाया व्यवस्थापनका लागि स्थानीय तहले करोडौँ खर्च गरिसकेका भए पनि समस्या अझै ज्युँका त्युँ छ । दिनभर जङ्गलमा बस्ने छाडा चौपाया राति खेतमा पुगेर कृषिबालीमा नोक्सान गर्ने गरेको किसानले बताएका छन् ।
बाली जोगाउन रातभर खेतमा जाग्राम बस्ने र दिनभर घरकै काममा व्यस्त रहने गरेका कारण चुनाव प्रति खासै चासो नदिएको कैलारी गाउँपालिका वडा नम्बर–५ का कृषक बाँधुराम डङ्गौराले बताए । उनले रातभरि खेतमा बसेर बाली खान आएका चौपायालाई धपाउने गरेको बताए ।
चुनाव आएका बेला राजनीतिक दल र नेताले छाडा चौपाया समस्या समाधान सहित किसानलाई आवश्यक पर्ने कृषि सामग्री, मलखाद लगायतबारे चिल्ला कुरा गर्ने तर जितेपछि समस्या नहेर्ने गरेको किसानको गुनासो छ ।
कृषिप्रधान देशमा किसान समस्यै समस्याबाट गुज्रिँदै आएको बताउदै उनीहरूले दलका नेता, उम्मेदवारलाई किसानको समस्यालाई चुनावी एजेन्डामा समेट्न आग्रह गरेका छन् ।
