कार्तिक २७ बैतडी । आगामी फागुन २१ गते हुने प्रतिनिधिसभा सदस्य निर्वाचनका लागि बैतडीमा पनि फोटो सहितको मतदाता नामावलीमा उत्साहजनक रुपमा नाम दर्ता गर्नेको सङ्ख्या बढ्दै गएको छ ।
गत असोज ९ गते देखि नामावली सङ्कलन र अद्यावधिक कार्य सुरु भएकोमा फोटो सहितको मतदाता नामावलीमा उत्साहजनक रुपमा नाम दर्ता गर्नेको सङ्ख्या बढ्दै गएको हो ।
जिल्ला निर्वाचन कार्यालयका कम्प्युटर अपरेटर रतन चन्दले हाल सम्म ६ सय १८ जनाको नाम दर्ता भइसेकको जानकारी गराए । २ सय १ जना महिला र ४ सय १७ पुरुष गरी ६ सय १८ जनाको नाम दर्ता भइसेकको उनले जानकारी गराएका हुन ।
त्यसैगरी बाहिरी जिल्लाका दुई जना महिला र सात जना पुरुषको पनि नाम दर्ता भएको जिल्ला निर्वाचन कार्यालयका निमित्त प्रमुख पुरुषोत्तम जोशीले जानकारी गराए । यसअघि बैतडीमा एक लाख ६१ हजार ३ सय १२ जनाको नामावलीमा नाम दर्ता भएको तथ्याङ्क रहेको छ ।
जसमा ८२ हजार १ सय २६ जना पुरुष, ७९ हजार १ सय ८४ जना महिला र दुई जना तेस्रोलिङ्गी रहेका छन् । निर्वाचन आयोगको वेबसाइट www. election. gov.np मा गएर अनलाइन मार्फत आफ्नो विवरण आफैँ भर्न सक्ने व्यवस्था पनि गरिएको छ ।
अनलाइन विवरण भरिसके पछि आवेदन फारम प्रिन्ट ल्याएर निर्वाचन कार्यालयमा फोटो र फिङ्गर प्रिन्ट लिनुपर्ने बताईएको छ । त्यसपछि नामावलीमा नाम दर्ता हुने गरेको छ । नामावलीमा यसअघि नाम दर्ता गराउन छुटेका सम्पूर्णलाई नाम दर्ता गराउन जिल्ला निर्वाचन कार्यालयले आग्रह गरेको छ ।
सोह्र वर्ष उमेर पुगेर नेपाली नागरिकताको प्रमाणपत्र लिएका नागरिकले फोटो सहितको मतदाता नामावलीमा नाम दर्ता गर्न सक्ने छन् । फोटो सहितको मतदाता नामावलीमा नाम दर्ता १६ वर्षमा हुने भए पनि मताधिकारका लागि १८ वर्ष पूरा भएको हुनुपर्ने प्राब्धान रहेको छ ।
