असोज ०३ धनगढी । जिल्ला प्रशासन कार्यालय कैलालीको सबैभन्दा पुरानो प्रशासनिक भवन भत्किएको छ । जिल्ला प्रशासन कार्यालयको राणाकालीन ऐतिहासिक भवन जेन्जी आन्दोलनकारीहरुले आगो लगाए पछि भत्किएको हो ।
राणाकालीन समयमा निर्माण गरिएको भवनमा जेनजी आन्दोलनकारीले भदौ २४ गते आगजनी गर पछि भवन पूर्ण रूपमा भत्किएको हो । उक्त भवनबाट जिल्ला प्रशासन कार्यालयले आफ्नो सेवा दिँदै आएको थियो । यसअघि प्रशासनले आफ्नो सेवा पूर्ण रूपमा यही ऐतिहासिक भवनबाट दिदै आएको भए पनि नयाँ भवन निर्माणपछि पुरानो भवनबाट राष्ट्रिय परिचय पत्रको काम मात्रै हुने गरेको थियो ।
जिल्ला प्रशासन कार्यालय परिसरमा भवन भग्नावशेष रुपमा मात्रै रहेको छ । आगजनीबाट कैलालीको एउटा महत्वपूर्ण सम्पदा ध्वस्त भएको छ । स्थानीय प्रभाकर भण्डारीले महत्वपूर्ण सम्पदा खरानी भएको बताउदै आन्दोलनकारीले कैलालीको इतिहास जलाएको बताए । राणा शाषनका बेला कैलाली र कञ्चनपुरको गोश्वारा (प्रशासनिक केन्द्र) कञ्चनपुरको बेलौरीमा रहेको बताइन्छ ।
पछि विक्रम संवत् १९९७ मा त्यो गोश्वारा धनगढी सारिएको थियो । त्यसता धनगढीमा गोश्वारा, अञ्चलाधीशको कार्यालय, कारागार, वन विभाग र मालअड्डा गरी पाँच वटा कार्यालय मात्रै पक्की घरमा रहेको धनगढीको विकासका साक्षी स्वर्गीय शिवदत्त जोशीले लेख्नुभएको ‘उहिलेको धनगढी’ भन्ने लेखमा उल्लेख गरिएको छ ।
त्यसताकाको गोश्वारा पछि जिल्ला प्रशासन कार्यालयमा परिणत भएको बताइन्छ । पूर्ण रूपमा नष्ट भएको भवनको अभिलेख नभएका कारण कहिले बनेको हो भन्ने यकिन हुन नसकेको जिल्ला प्रशासन कार्यालयका सूचना अधिकारी शिवराज जोशीले बताए । भवन पुनर्निर्माण गर्ने वा के गर्ने भन्ने विषयमा कुनै निर्देशन नआएको उनले जानकारी गराए । भवनको अभिलेख खोजिरहेको समेत जोशीले जानकारी गराए ।
