भदौ १५ धनगढी । धनगढीस्थित एसटिएस सिनेमा हल धनगढीमा गाईजात्रा शो हुने भएको छ । भोलि साँझ ५ बजे देखि ८ बजे सम्म सञ्चालन हुने शो का लागि टिकट मूल्य ५ सय रुपैयाँ तोकिएको छ । उक्त शोमा सुदूरपश्चिम प्रदेश सरकारका प्रमुख व्यक्तिहरु, जनप्रतिनिधि लगायतका व्यक्तिहरूको सहभागिता रहने आयोजकले जनाएको छ ।
गाईजात्रा शोमा राजनीति अस्थिरता, भाषा, कला, संस्कृति, विकृति, विसङ्गति लगायतका विभिन्न समसामयिक विषयवस्तु समेटिएको सरस्वती भट्टले बताइन् । शोको माध्यमबाट दर्शकलाई वर्तमान समाजका विविध पक्षहरूको चित्रण प्रस्तुत गर्ने उद्देश्य रहेको उनले बताइन् ।
पत्रकार सम्मेलन गर्दै आयोजकले उक्त शोको टेलर पनि सार्वजनिक गरेको थियो । जसमा विविध विषय वस्तुहरूको झलक देखाइएको थियो । गाईजात्रा शो काठमाडौँ लगायतका क्षेत्रमा पहिले देखि नै हुने गरेको भए पनि धनगढीमा पहिलो पटक हुन लागेको हो । यसले समाजका विभिन्न पक्षहरूको चित्रण गर्ने र सकारात्मक सन्देश प्रवाह गर्ने विश्वास गरिएको छ ।
