साउन ०९ कञ्चनपुर । महेन्द्रनगर नगर विकास समितिको जमिन लिज प्रकरणमा १ सय ४० जनाविरुद्ध मुद्दा दर्ता भएर अनुसन्धान भईरहेको छ । तत्कालीन महेन्द्रनगर नगर विकास समितिको जमिन लिजमा लिने देखि दिने सम्म गरी १ सय ४० जनाका नाममा विशेष अदालतमा मुद्दा दर्ता भएर दोस्रो चरणको अनुसन्धान चलिरहेको छ ।
नगर विकास समितिका तत्कालीन अध्यक्ष पल्टु राना, मालपोत कार्यालय कञ्चनपुरका तत्कालीन कार्यालय प्रमुख बिसन सिंह थापा समेत २५ जना, तत्कालीन अध्यक्ष कान्तुराम पनेरू सहित २२ जना, तत्कालीन अध्यक्ष गोपाल रसाइली सहित ६४ जना विरुद्ध छुट्टाछुट्टै तीन वटा मुद्दा दर्ता भएर अनुसन्धान चलीरहेको हो । अख्तियारले थप १ सय ८० जनाका नाममा मुद्दाको तयारी भइरहेको अख्तियार दुरुपयोग अनुसन्धान आयोगले जनाएको छ ।
तत्कालीन नगर विकास समितिका अध्यक्ष देखि कर्मचारी, मालपोत र नापी कार्यालयका प्रमुख देखि कर्मचारी र जमिन खरिद गर्ने लगायतका ब्याक्तिहरुका नाममा मुद्दा दर्ता भएर अनुसन्धान चलीरहेको अख्तियारले जनाएको छ । अख्तियारले तत्कालीन दुई अध्यक्ष, नगर विकास समिति, मालपोत र नापी कार्यालयका प्रमुख सहित १५ कर्मचारी र ४७ जना जमिन खरिद गर्नेहरू विरुद्ध मुद्दा दर्ता गरिएकोमा उनीहरूबाट दुईदेखि तीन करोडसम्म विगो माग गरिएको छ ।
महेन्द्रनगर नगर विकास समितिको मातहतमा महेन्द्रनगर बजार क्षेत्रमा रहेको जग्गा लिज र बिक्री गर्ने नाममा अध्यक्षहरूले तोकादेशका भरमा बिक्री वितरण गरेका थिए । २०३५ मा गठन भएको नगर विकास समितिको नाममा ६ सय ३८ बिघा जमिन भए पनि हाल समितिको नाममा करिब ६० बिघा मात्रै बाँकी रहेको छ । २०६७ पछि नियुक्त भएका अध्यक्षहरूले आफू निकटका व्यक्तिहरूलाई तोकादेशका आधारमा जमिन बिक्री वितरण गर्दै आए पछि मुद्धा दायर गरिएको थियो ।
