असार २५ अछाम । अछामको मेल्लेख गाउँपालिकामा औद्योगिक ग्राम सञ्चालनमा आएको छ । गाउँपालिकाले स्थापना गरेको ग्राममा छ वटा उद्योग सञ्चालनमा आएका छन् ।
उद्योग सञ्चालनमा उद्यमीलाई तालिमसँगै उत्पादनको बजारीकरण पनि सुरु गरिएको छ । ग्राममा अल्लो, गार्मेन्ट, चिप्स उद्योग, अचार, दालमोट, सिस्नोको धुलो उद्योग स्थापना भई उत्पादन सुरु गरिएको गाउँपालिकाले जनाएको छ । ती उद्योगबाट २१ जनाले रोजगारी पाएको गाउँपालिकाले जनाएको छ ।
ग्रामभित्र उद्योग सञ्चालन गरी उद्यमीलाई तालिम सुरु गरेको गाउँपालिकाले जानकारी गराएको छ । सरकारले चार वर्ष अगाडि औद्योगिक ग्राम घोषणा गरे पनि हाल सम्म अछामको मेल्लेख गाउँपालिकाले मात्र ग्राम स्थापना गरी सञ्चालनमा ल्याएको हो ।
अन्य ठाउँमा भने ग्राम निर्माणकै क्रममा रहेको उद्योग, वाणिज्य तथा आपूर्ति मन्त्रालयले जनाएको छ । सरकारले मुलुकभर विभिन्न ठाउँमा १ सय २० औद्योगिक ग्राम घोषणा गरेको छ । चालु आसर्थक बर्षमा १५ वटा ग्राम घोषणा गरेको छ ।
