अस्मिता अधिकारी पछिल्लो समय एकदमै रुचाइएकी गायिका हुन् । रियालिटी शो नेपाल आइडलबाट लाइमलाइटमा आएकी अस्मिताका टाढा भएपनि, सुनैको दरबार, रमरम मरौटी, तिम्रो मायाले बाँधेर राख लगायत थुप्रै गीत लोकप्रिय छन् ।
स्टुडियोदेखि स्टेजसम्म नै सर्वाधिक रोजाइकी गायिका अस्मिताको दिनचर्या कस्तो छ ? उनका रुचिहरु के के छन् ? लगायतका विषयमा गरिएको कुराकानी :
बिहान कति बजे उठ्नुहुन्छ ? उठ्ने तालिका नियमित छ कि छैन ?
सात बजेसम्म उठिसक्छु । तालिका नै भनौं ।
उठ्नासाथ के गर्नुहुन्छ ? मोबाइल चलाउनुहुन्छ कि पूजापाठ गर्नुहुन्छ ?
उठेर पानी पिउँछु । दुवै गर्दिन ।
बिहान फ्रेस भइसकेपछि योग ध्यान वा एक्सरसाइज गर्नुहुन्छ ?
बिहान फेस्र भइसकेपछि म आधा घण्टा हिँड्छु ।
बिहान नास्ता खानुहुन्छ कि हुन्न ?
त्यस्तो नास्ता नै भन्ने त छैन । चिया, अण्डा यस्तै खाने हो ।
बिहानको खाना कति बजे खानुहुन्छ ?
११ बजेसम्म खाइसक्छु ।
कस्तो खाना रुचाउनुहुन्छ ?
घरमा पाकेको दाल, भात र तरकारी । मलाई साधारण खाना मन पर्छ ।
तपाईंको खानामा छुट्दै नछुट्ने चिज के हो ?
दाल अनिवार्य हुन्छ ।
माछा–मासु कत्तिको खानुहुन्छ ?
दुवै मलाई मन पर्छ । त्यसमा पनि माछा अझ बढी । मासुमा कुखुरा र खसीको खान्छु ।
मदिरापान गर्नुहुन्छ ?
गर्दिन ।
भान्सामा काम गर्ने जाँगर कति चल्छ ?
फुर्सद हुँदासम्म गर्छु ।
तपाईंलाई आफैंले बनाएको कुन खानेकुरा बढी मन पर्छ ?
कुखुराको मासु मीठो बनाउँछु जस्तो लाग्छ ।
बाहिर रेष्टुरेन्टमा मीठो कि घरमा बनाएको ?
म प्रायः बाहिर खाँदिन । घरकै धेरै मीठो हुन्छ ।
एकदमै भोक लागेको तर खाना खाने अनुकूलता नमिलेको कुनै क्षण छ ?
एकदमै भोक लागेको बेला खाना नपाएको क्षण त कति छ कति । रेकर्डिङकै सिलसिलामा कत्तिपटक भएको छ । कहिले त एक दिनमा तीन चारवटासम्म गीत रेकर्डिङ हुन्छ । एउटा रेकर्डिङपछि अर्को ओभरल्याप हुन्छ । एउटा स्टुडियोबाट अर्कोमा जाँदा ट्राफिक जाम हुन्छ यसले गर्दा खाना समयमा खान पाएकी छैन । पानी मात्र खाएर मैले धेरै गीत गाएकी छु ।
घरमा कुचो लगाउने, सरसफाइ गर्ने, भाँडा माझ्ने, लुगा धुने काम आफैं गर्नुहुन्छ ?
काठमाडौं बाहिर नगएको बेला बेलुका घरको काममा मम्मीलाई सहयोग गर्छु । खाना खाएपछि मम्मी र म मिलेर भान्साको काम सक्छौं ।
घरबाट बाहिर निस्कनुअघि मेकअपमा कति समय लाग्छ ?
मलाई आधा घण्टा लाग्छ ।
बाहिर हिंडडुल गर्दा कस्तो लुगा सहज लाग्छ ?
लगाउँदा सहज हुने एकदम सिम्पल लुगा राम्रो लाग्छ । जिन्स, टीसर्ट यस्तै ।
गरगहनामा कत्तिको आशक्ति छ ?
मलाई सुनको गहना मन पर्र्छ । सिक्री, औंठीसँगै घडी लगाएको छु ।
तपाईं कस्तो सवारी साधन प्रयोग गर्नुहुन्छ ?
भेस्पाको स्कुटी ।
प्रायः दिन कसरी बित्छ ?
धेरैजसो रेकर्डिङमै बित्छ । संगीतकर्ममा रमाउने भएकाले होला मेरो पूरा समय यसैमा बित्छ ।
एक दिनमा कतिवटासम्म गीत रेकर्ड गर्न भ्याउनुहुन्छ ?
मैले दिनमा चारवटासम्म गीत रेकर्ड गरेको छु ।
साँझ कति बजे घर फर्कनुहुन्छ ?
कामले निर्धारण गर्दछ । त्यस्तै ८ देखि ११ बजेभित्र घर फर्कंन्छु ।
बेलुकाको खाना कति बजे खानुहुन्छ ?
घर कति बेला पुग्छु भन्ने हुन्छ । यही समयमा खान्छु भन्ने छैन ।
बेलुकाको खानामा के के हुन्छ ?
साधारण दाल, भात र तरकारी ।
कति बजे सुत्नुहुन्छ ?
प्रायः १० देखि ११ बजेभित्र सुतिसक्छु ।
