असार ११ धनगढी । कैलालीमा ग्रिनेड विस्फोट हुँदा नेपाली सेनाका हुद्दाको मृत्यु भएको छ भने सहसेनानी घाईते भएका छन । मोहन्याल गाउँपालिका वडा नम्बर–७ को जालपा सामुदायिक वन क्षेत्रमा सञ्चालन भइरहेको फायरिङ अभ्यासका क्रममा ग्रिनेड विस्फोट हुँदा नेपाली सेनाका हुद्दा हिमाल विक्रम विष्टको मृत्यु भएको हो भने सहसेनानी हिमराज जोशी घाईते भएका हुन ।
जिल्ला प्रहरी कार्यालय कैलालीका प्रहरी नायव उपरिक्ष तथा प्रहरी प्रवक्ता योगेन्द्र तिमिल्सिनाले ग्रिनेड विस्फोट हुँदा नेपाली सेनाका हुद्दा विष्टको मृत्यु भएको जानकारी गराउदै छर्रा लागेर सहसेनानी जोशी घाइते भएको जानकारी गराए । विष्टको लम्कीस्थित लालरत्न अस्पतालमा उपचारका क्रममा दिउँसो १२ बजेतिर मृत्यु भएको प्रहरी नायव उपरिक्ष तिमिल्सिनाले जानकारी गराए ।
सोही घटनामा छर्रा लागेर घाइते भएका सहसेनानी जोशीको अवस्था सामान्य रहेको तिमिल्सिनाले जानकारी गराए । जोशीलाई थप उपचारका लागि नेपाली सेनाको हेलिकोप्टर मार्फत काठमाडौं पठाइएको उनले बताए ।
बिहीबार बिहान ९ः१७ बजे सुदूरपश्चिम पृतना तालिम शिक्षालय गोराङ्गे ब्यारेकबाट फायरिङ अभ्यासका लागि खटिएका नेपाली सेनाका बिष्ट ग्रिनेड पड्काउने क्रममा घाइते भएका थिए । विस्फोटबाट उनको दाहिने हातको हत्केला तथा शरीरका विभिन्न भागमा छर्रा लागेर गम्भीर घाइते भएका थिए । अस्पतालमा उनलाई मृत घोषणा गरिएकोथियो ।
