विष्णु विश्वकर्मा, फाल्गुन १० बागलुङ । राष्ट्रपति विद्यादेवी भण्डारीले बागलुङ भगवती मन्दिरमा दर्शन तथा पूजा अर्चना गर्नु भएको छ । बुधबार राष्ट्रपति विद्यादेवी भण्डारीले बागलुङ भगवती मन्दिरमा दर्शन तथा पूजा अर्चना गर्नु भएको हो । गन्तव्य कालिका अभियान चलाएको कालिका भगवती गुठी व्यवस्थापन समितिले राष्ट्रपति विद्यादेवी भण्डारीलाई मन्दिरमा स्वागत गरेको थियो ।
जिल्लामा आउने उच्च पदस्थलाई स्वागत गर्ने गुठीको पुरानो चलन छ । यस अघि पनि तत्कालीन राजारानी, पूर्वराष्ट्रपति र उपराष्ट्रपति, प्रधानमन्त्री लगायतका मन्त्रिगण समेतलाई नियमित स्वागत गर्दै आएको गुठीका अध्यक्ष कुमार खड्काले बताए । हेलिकोप्टरमा आउनु भएकी राष्ट्रपति विद्यादेवी भण्डारी बाङ्गेचउर खेल मैदानमा अवतरण भए पछि गाडी चढेर कालिका मन्दिर पुग्नु भएको थियो । राष्ट्रिय सभाका अध्यक्ष गणेश तिमिल्सना पनि राष्ट्रपति भण्डारीको साथमा रहेका थिए ।
राष्ट्रपति भण्डारीले आफ्नो कार्यकालमा पहिलो पटक बागलुङ कालिका मन्दिरको दर्शन गर्नु भएको हो । राष्ट्रपतिको स्वागतका लागि पञ्चकन्या, गुठी व्यवस्थापन समितिका पदाधिकारी र स्थानीयको भीड लागेको थियो । गण्डकी प्रदेश सभाकी उपसभामुख बिना थापा सहित जिल्लाबाट प्रतिनिधित्व गर्ने सबैजसो सांसद पनि सहभागी भएका थिए । जिल्ला समन्वय समितिका संयोजक अमर थापा, बागलुङ नगरप्रमुख बसन्तकुमार श्रेष्ठ, जिल्ला अधिकारी रोशनीकुमारी श्रेष्ठ सहित सुरक्षाका उच्च पदस्थ अधिकारी पनि मन्दिरमा पुगेका थिए ।
राष्ट्रपतिले पूजा गरेपछि मन्दिरको आगन्तुक पुस्तिकामा हस्ताक्षर गरेर पर्वतको जलजला गाउँपालिकामा आयोजित कुलमन्दिर उद्घाटन कार्यक्रममा राष्ट्रपति गुग्नु भएको थियो । राष्ट्रपति आउने कार्यक्रमले एक घण्टा सवारी आवागमन रोकिएको थियो । त्यहाँ आयोजित ५ औं राष्ट्रपति खेलकुद प्रतियोगिताको फाइनल खेल पनि मंगलबार बेलुकीबाटै रोकेर हेलिप्याड बनाइएको थियो । खेल रोकिए पछि बुधबार दिउँसोबाट सञ्चालन गरिएको आयोजकले जनाएको छ ।
