चैत्र ०११ बझाङ । अख्तियार दुरुपयोग अनुसन्धान आयोगले बझाङको बित्थडचिर गाउँपालिकाका तत्कालीन निमित्त प्रमुख प्रशासकीय अधिकृत चक्रदेव भट्ट सहित ५ जनाविरुद्ध भ्रष्टाचार मुद्दा दायर गरेको छ ।
गाउँपालिकाको वडा नम्बर–९ स्थित बागथला धारी डोबा सडकमा सिँचाइ क्यानल तथा ह्युम पाइप कल्भर्ट निर्माण गर्दा भ्रष्टाचार गरेको ठहर गर्दै आयोगले विशेष अदालतमा मुद्दा दायर गरेको हो ।
तत्कालिन लेखापाल रामचन्द्र धामी, तत्कालिन इन्जिनियर सन्देश भण्डारी, सव इन्जिनियर किरण भण्डारी र भुमिराज कन्स्ट्रक्सध धनगढीका सञ्चालन मान बहादुर बोहरा विरुद्ध आयोगले मुद्दा दायर गरेको हो ।
आयोगका अनुसार निर्माणका क्रममा फिल्डमा काम नभएको तथा कम काम भएको अवस्थामा पनि बढी काम भएको देखाई झुट्टा बिल भरपाईका आधारमा भुक्तानी दिने र लिने कार्य गरी भ्रष्टाचार गरिएको हो ।
सरकारी रकम गैरकानुनी रूपमा लाभ वा हानी पु¥याउने उद्देश्यले भुक्तानी दिएको आयोगले दाबी गरेको छ । तत्कालीन निमित्त प्रमुख प्रशासकीय अधिकृत भट्टसहित अन्य कर्मचारी र निर्माणसँग सम्बन्धित पाँच जनालाई प्रतिवादी बनाइएको छ ।
उनीमाथि भ्रष्टाचार निवारण ऐन, २०५९ को दफा ८ को उपदफा (१) को खण्ड (ग) र (ङ) एवं सोही ऐनको दफा ८ को उपदफा (४) बमोजिमको कसुरमा कारबाहीको माग गरिएको छ ।
आयोगले उनीहरुबाट आठ लाख ४८ हजार ९ सय ६२ रुपैयाँ २२ पैसा बिगो कायम गरी सोही बमोजिम जरिवाना र कैद सजायको मागदाबी गरेको छ । उक्त बिगो समेत असुल उपर गर्न माग गरिएको आयोगले जनाएको छ ।
