चैत्र ०२ कञ्चनपुर । व्यावसायिक रूपमा केराखेती गर्ने किसानलाई प्रोत्साहन गर्न कञ्चनपुरको कृष्णपुर नगरपालिकाले ५० प्रतिशत अनुदानमा केराका बिरुवा उपलब्ध गराउने भएको छ । केराखेती विस्तार तथा किसानको मागलाई मध्यनजर गर्दै कृष्णपुर नगरपालिकाले ५० प्रतिशत अनुदानमा केराका बिरुवा उपलब्ध गराउने भएको हो । नगरपालिकाका कृषि शाखा प्रमुख लालबहादुर धामीले किसान, कृषि समूह, फर्म, सहकारी तथा कृषि उद्यमीलाई मागका आधारमा केराका बिरुवा उपलब्ध गराउने जानकारी गराए ।
किसानलाई १० लाख मूल्य बराबरका केराका बिरुवा वितरण गर्ने लक्ष्य राखिएको उनले जानकारी गराए । केराका बिरुवाको मूल्यको आधा रकम नगरपालिका र आधा रकम किसानले व्यहोर्ने उनले जानकारी गराए । किसानलाई अनुदानमा बिरुवा उपलब्ध गराउन नगरपालिकाले पाँच लाख बजेट विनियोजन गरेको उनले जानकारी गराए । यस कार्यक्रमबाट केरा खेतीमा संलग्न किसानलाई थप प्रोत्साहन मिल्ने अपेक्षा गरिएको उनले बताए । हाल कृष्णपुर नगरपालिकामा व्यावसायिक रूपमा ३५ जना भन्दा बढी किसान केरा खेती गर्दै आएका छन ।
नगरपालिकाको विभिन्न क्षेत्रमा करिब ५५ हेक्टर भन्दा बढी जमिनमा केराखेती हुँदै आएको कृषि शाखा प्रमुख धामीले जानकारी गराए । अनुदानमा केराका बिरुवा वितरणका लागि नगरपालिकाले ३० दिने सार्वजनिक सूचना जारी गरेको उनले बताए । इच्छुक किसान, कृषि समूह, फर्म, सहकारी तथा कृषि उद्यमीले तोकिएको समय भित्र आवश्यक कागजात सहित निवेदन दिन सक्ने व्यवस्था गरिएको उनले बताए ।
निवेदनका साथ केराका बिरुवाको सङ्ख्या, केराको जात, किसान समूह वा सहकारीको दर्ता प्रमाण पत्रको प्रतिलिपि, खेती गर्ने जमिनको क्षेत्रफल खुल्ने जग्गाधनी पुर्जाको प्रतिलिपि पेस गर्नुपर्ने सर्त राखिएको उनले बताए । एलानी जग्गामा खेती गर्ने भए भोगचलन प्रमाण र भाडामा लिएको भए करार सम्झौताको प्रतिलिपि समेत पेश गर्नुपर्ने नगरपालिकाले जनाएको छ । नगरपालिकाले यस कार्यक्रम मार्फत स्थानीय स्तरमा केरा उत्पादन वृद्धि गर्दै किसानको आम्दानी बढाउने र कृषि क्षेत्रमा रोजगारीका अवसर सिर्जना गर्ने लक्ष्य लिएको बताइको छ ।
