फागुन २९ बाजुरा । बाजुराको बडीमालिका नगरपालिका वडा नम्बर–४ स्थित ओलेना बस्ती २०७६ सालको बुढीगङ्गा नदीको बाढीपछि उजाड बन्दै गएको छ । कुनै समय जिल्लाकै तरकारी उत्पादनको केन्द्र मानिने ओलेनामा २०७६ सालको बुढीगङ्गा नदीको बाढीपछि उजाड बन्दै गएको हो । अहिले खेतीयोग्य जमिन नष्ट भई बस्ती विस्थापनको जोखिममा परेको छ ।
२०७६ साल साउन–भदौमा बुढीगङ्गा नदीमा आएको बाढीले ओलेनाबासीको सबै खेतीयोग्य जमिन बगरमा परिणत गरिदिएको थियो । सिँचाइ कुलोको राम्रो व्यवस्था र समथल जमिनका कारण उत्पादन हुने तरकारी बाजुराको मार्तडी बजारसम्म बिक्री हुँदै आएको भए पनि बाढीपछि स्थानीयको मुख्य आम्दानीको स्रोत पूर्ण रूपमा बन्द भएको छ ।
स्थानीय कृषक देवबहादुर नाथले पहिले धान, गहुँभन्दा बढी तरकारी र फलफूल खेती गरेर परिवार पालिँदै आएको बताउदै सबै जमिन बगर बनेपछि अब बालबच्चा कसरी पाल्ने भन्ने चिन्ता लागेको बताए । साँफे–मार्तडी राजमार्गको मुनि रहेको ओलेना बस्तीका घरहरू पनि अहिले नदी कटानको उच्च जोखिममा छन् ।
खेतीयोग्य जमिन गुमेपछि मात्र होइन, बसोबास संकटमा परेपछि केही परिवार बस्ती छोडेर अन्यत्र सर्न थालेका छन् । पहिला १६ भन्दा बढी नाथ परिवार बसोबास गर्ने ओलेनामा अहिले झण्डै १३ परिवार मात्र बाँकी रहेका छन् । स्थानीय शिक्षक कमल नाथले ओलेनाबाट उत्पादन भएको तरकारी मार्तडी बजारका अधिकांश पसलमा पुग्ने गरेको स्मरण गर्दै ओलेनाबासीको मुख्य पेसा तरकारी खेती अहिले बन्द भउको बताए ।
अहिले खेती गर्ने जमिन मात्र नभई, घरबासको समेत समस्या भएको उनले बताए । जिल्ला प्रशासन कार्यालय बाजुराका प्रमुख जिल्ला अधिकारी तथा विपद् व्यवस्थापन समितिका संयोजक डोरेन्द्र निरौलाले ओलेना बस्ती पूरै नदीको जोखिममा रहेकाले स्थानान्तरणका लागि सम्बन्धित निकायसँग समन्वय भइरहेको बताए ।
स्थानीयका अनुसार अहिलेसम्म सुरक्षित बसोबासको कुनै ठोस व्यवस्था हुन सकेको छैन । दीर्घकालीन व्यवस्थापन र पुनस्र्थापनाको पहल नहुँदा बाँकी रहेका परिवार समेत विस्थापनको अवस्थामा पुग्ने खतरा बढ्दै गएको स्थानीयले बताएका छन ।
