फागुन ११ बझाङ । आगामी फागुन २१ गते हुने प्रतिनिधि सभा सदस्य निर्वाचनका लागि बझाङमा २ हजार ८ सय ८३ जना सुरक्षाकर्मी परिचालन गरिने भएको छ । निर्वाचनको सुरक्षालाई ध्यानमा राख्दै जिल्लामा २ हजार ८ सय ८३ जना सुरक्षाकर्मी परिचालन गरिने भएको हो । निर्वाचनलाई सुरक्षित बनाउनका लागि यस पटक २०७९ सालको निर्वाचन भन्दा बढी कडाई गरिएको प्रशासनले जनाएको छ ।
जिल्ला प्रहरी कार्यालयका प्रहरी नायव उपरिक्षक खगेन्द्र धमलाले विगतका कमजोरी नदोहोरिने गरी सुरक्षा योजना तयार गरिएको बताए । निर्वाचनका लागि कुल २ हजार ८ सय ८३ जना सुरक्षाकर्मी परिचालन गर्न लागिएको उनको जानकारी गराए । जिल्लामा निर्वाचनका लागि ७ सय ११ जना नेपाल प्रहरी, ४ सय ८ जना नेपाली सेना, १ सय ८४ जना सशस्त्र प्रहरी र १ हजार ५ सय ८० जना निर्वाचन प्रहरी खटाईने उनले बताए ।
निर्वाचनलाई स्वच्छ, निष्पक्ष र शान्तिपूर्ण वातावरणमा सम्पन्न गर्न सबै तयारी पूरा भएको प्रशासनले जनाएको छ । जिल्लामा कुल १ लाख २६ हजार ९ सय ३ जना मतदाता रहेका छन् । तीमध्ये ६२ हजार २ सय ८९ जना पुरुष र ६४ हजार ६ सय १४ जना महिला मतदाता रहेका छन् । निर्वाचनका लागि २ वटा अस्थायी मतदान केन्द्र, १ सय ८९ स्थायी मतदान केन्द्र र १ सय ३७ मतदान स्थल तोकिएका छन् ।
तीमध्ये ३ वटा मतदान स्थल सामान्य, ४९ वटा संवेदनशील र ८५ वटा अति संवेदनशील सूचिमा राखिएको छ । जिल्ला कारागार र जिल्ला समन्वय समितिको कार्यालयमा अस्थायी मतदान केन्द्र स्थापना गरिने भएको छ । मुख्य निर्वाचन अधिकृत सुवर्णमान नेपालीले जिल्लामा ५१ प्रकारका निर्वाचन सामग्री पुगिसकेको बताए ।
मतदाता शिक्षा, जनशक्ति व्यवस्थापन देखि सुरक्षा रणनीति सम्मका कार्य अन्तिम चरणमा पुगेको जिल्ला निर्वाचन कार्यालय बझाङका प्रमुख वसन्तबहादुर धानुकले बताए । उनले निर्वाचनमा १ हजार १ सय ३४ जना कर्मचारी खटनपटन भइसकेको र उनिहरुलाई आवश्यक तालिम दिने तयारी भैरहेको बताए । फागुन ३ गते देखि जिल्लाका १२ वटै स्थानीय तहका ९४ वडामा स्वयंसेवक परिचालन गरी मतदाता शिक्षा कार्यक्रम सञ्चालन भइरहेको उनले बताए ।
