फागुन ०४ कञ्चनपुर । शुक्लाफाँटा राष्ट्रिय निकुञ्जको पिपरैयास्थित हात्तीसारमा रहेकी अढाई वर्षकी शुक्लाकली नामक हात्तीलाई तालिम दिने काम भइरहेको छ । नारायणीकलीले जन्माएकी शुक्लाकली पोथी हात्तीलाई मानिसले चलाउन सक्ने गरी तालिम दिने काम भइरहेको हो । अढाई वर्ष भन्दा बढी भएपछि अहिले उसलाई निकुञ्ज भित्रै गस्ती गर्न होस् वा वन्यजन्तुको उद्धार गर्न र पर्यटकलाई सफारी गर्नका लागि तालिम दिने काम भइरहेको हो ।
हात्तीसारका दरौगा आनन्द सुनाहाले शुक्लाकलीलाई माघ ११ गतेदेखि तालिम दिन सुरु गरिएको जानकारी गराएका हुन । सुरुको तीन दिन एउटा खम्बामा बाँधेर छेउमै आगो बालेर रात दिन भाषा र मानिसलाई बसाउन सिकाउने काम गरिएको उनले बताए । त्यतिबेला हात्तीलाई रात दिन बस्न र सुत्न समेत नदिने बताउदै उनले ‘बस्न र सुत्न दिए बिर्सिन सक्छ भनेर लगातार तालिम दिइने बताए । त्यतिबेला बोली, भाषादेखि मानिसको इसारामा चल्न सक्ने बनाइने बताउदै उनले तीन दिन जति रात दिन तालिम दिएपछि हिँड्न सिकाउने काम सुरु गरिएको बताए ।
सुरुमा निकुञ्जकै जंगलमा र त्यसपछि गाउँवस्ती हुँदै अहिले बजार क्षेत्रमा पनि हिँडडुल गर्न सिकाउने गरिएको उनले बताए । भिडभाडमा पनि सहजै हिँडडुल गर्न सक्ने र गाडीहरु देख्दा नि नडराउने गरी सिकाइने बताउदै सुनाहाले वन्यजन्तु वस्तीमा पसेका बेला भीडभाडमा उद्धार गर्नुपर्ने भएकाले अहिले देखि नै भिडमा लैजान थालेको बताए । शुक्लाकलीलाई निकुञ्जकै लवप्रसाद, श्रुतिकली र शेषचन्द्र गजराज नामका हात्तीहरुले गाइड गरिरहेको उनले बताए ।
श्रुतिकली र लवप्रसाद वयस्क हात्ती भएको जानकारी गराउदै उनले शेषचन्द्र गजराजलाई दुई वर्षअघि मात्रै तालिम दिइएको बताए । अघि पछि यिनै हात्तीहरु राखेर एउटा ठूलो हात्तीलाई डोरीले बाँधेर नियन्त्रण गरिने उनले बताए । त्यसैगरी शुक्लाकलीका माहुते तौला रानाले गाउँ बस्ती र बजारसँगै जंगलमा पनि हिँड्न सिकाइरहेको बताउदै अहिले धेरै सिकिसकेको बताए ।
विस्तारै सबै सजिलो हुँदै जाने बताउदै उनले अहिले शुक्लाकलीलाई महाकाली किनारको भाइरल रोड, दोधारा चाँदनी नगरपालिकाको विभिन्न क्षेत्र र भीमदत्त नगरपालिकाको गड्डाचौकी र महेन्द्रनगर सम्म हिँडडुल गराइएको बताए । गाउँ बस्तीमा हात्ती पुग्दा हेर्नका लागि स्थानीयको भीड लाग्ने गरेको बताउदै उनले अधिकांशले हात्तीलाई फलफूल र दक्षिणाका रुपमा रुपैयाँ समेत दिने गरेको बताए ।
शुक्लाफाँटा राष्ट्रिय निकुञ्जमा १० वटा हात्तीको दरबन्दी भएपनि अहिले तालिम दिइरहेको सहित ४ वटा पोथी र ५ वटा भाले गरी ९ वटा हात्ती रहेको उनले जानकार्ी गराए । निकुञ्जमा गस्ती देखि जंगल सफारी गराउन र वन्यजन्तु वस्तीमा पसेमा उद्धार गर्नका लागि हात्ती आवश्यक पर्ने गरेको छ ।
