माघ २८ दार्चुला । दार्चुलाको महाकाली नगरपालिका वडा नम्बर–४ मा प्रहरी हवल्दार योगेन्द्र घर्तीको हत्या गरिएको घटनामा प्रहरीले तीन जनालाई पक्राउ गरेको छ । घर्तीको हत्यामा संलग्न रहेको आशंकामा महाकाली नगरपालिका वडा नम्बर–४ बस्ने २० वर्षीया दिपिका पाल, २१ वर्षीया पायल लुहार र सुरेन्द्र बमलाई प्रहरीले पक्राउ गरेको हो ।
सुदूरपश्चिम प्रदेश प्रहरी कार्यालय धनगढीका प्रवक्ता प्रहरी वरिष्ठ उपरीक्षक(एसएसपी) पदम बहादुर विष्टले उनीहरु ३ जनालाई पक्राउ गरिएको जानकारी गराएका हुन । घटनामा संलग्न तथा सहयोगीको भूमिका खेलेका अन्य चार जना भने फरार रहेको उनले जानकारी गराएका छन ।
अस्मिता बियर बारका सञ्चालक आशिक पाल, उनकी जेठी श्रीमती लक्ष्मी बडु, भाइ मनिस पाल र शव व्यवस्थापनमा सहयोग गर्ने राजेन्द्र डडाल फरार रहेको उनले बताए । पक्राउ गरिएकी दिपिका पाल भने आशिक पालकी कान्छी श्रीमती भएको प्रहरीले जनाएको छ ।
प्रारम्भिक अनुसन्धानका क्रममा अस्मिता बियर बारमा कान्छी श्रीमती दिपिकालाई जिस्काएको भन्दै उनका श्रीमान आशिकले प्रहरी हवल्दार घर्तीलाई कुटपिट गरेका थिए । पक्राउ गरिएकाहरुले आशिक र उनका भाइले कुटपिट गरेर हत्या गरेको बयान प्रहरीलाई दिए पनि त्यसको सत्य तथ्य छानविन गर्ने काम भइरहेको उनले जानकारी गराए ।
एसएसपी विष्टका अनुसार घर्तीको टाउकोमा धारिलो हतियार प्रहार गरिएको पाइएको छ । घटनापछि फरार रहेकाहरुको खोजी कार्य भइरहेको छ भने घटनाबारे थप अनुसन्धान जारी रहेको प्रदेश प्रहरी कार्यालयले जानकारी गराएको छ ।
