माघ १९ धनगढी । सुदूरपश्चिम प्रदेशसभाले ‘सुदूरपश्चिम प्रदेश स्थानीय सेवाको गठन तथा सञ्चालन पहिलो संशोधन विधेयक २०८२’ को संशोधन प्रस्तावलाई छलफलका लागि विधायन तथा प्रदेश मामिला समितिमा पठाउने प्रस्ताव स्वीकृत गरेको छ ।
आइतबार बसेको प्रदेशसभाको बैठकले आन्तरिक मामिला तथा कानुन मन्त्री हिरा सार्कीले उक्त विधेयक संशोधन सहित दफावार छलफल गर्न विधायन तथा प्रदेश मामिला समितिमा पठाइयोस् भनि पेस गरेको प्रस्ताव सर्वसहमतिले स्वीकृत गरेको हो ।
बैठकमा सभामुख भीमबहादुर भण्डारीले प्रदेशसभा सदस्य डाः ताराप्रसाद जोशीले पदबाट दिएको राजीनामा पछि डडेलधुरा जिल्ला प्रदेशसभा–२ को प्रदेशसभा सदस्य पद रिक्त भएको ब्यहोरा जानकारी गराएका थिए ।
तीन वर्षअघिको निर्वाचनमा डडेलधुरा, प्रदेशसभा–२ बाट स्वतन्त्र उम्मेदवारी दिएर निर्वाचित डाः जोशी आसन्न प्रतिनिधिसभा सदस्यका लागि सोही जिल्लामा राष्ट्रिय स्वतन्त्र पार्टीबाट चुनावी प्रतिस्पर्धामा रहेका छन् ।
बैठकको प्रारम्भमा सभामुखबाट समय लिएर प्रदेशसभा सदस्य अक्कल बहादुर रावलले चिसापानी—जङ्गलघाट—बडीमालिका सम्मको सडक अन्तर्गत जङ्गलघाटमा पुल निर्माणको प्रक्रिया सङ्घीय सरकारबाट रद्द गर्न लागिएको प्रति विरोध जनाउँदै पुल निर्माण कार्यलाई निरन्तरता दिन ध्यानाकर्षण गराएका थिए ।
