माघ ०२ अछाम । सात वर्षसम्म न्यायको खोजीमा प्रहरी र अदालत धाएर पनि न्याय नपाएकी अछामकी एक जना महिलाको दुःखद निधन भएको छ । अछामको पञ्चदेवल विनायक नगरपालिका वडा नम्बर–९कालेकाँडाकी ३८ वर्षीया जानकी धमलाको दुखद निधन भएको हो ।
न्याय नपाएको पीडा र आफूले भोगेका मानसिक यातनाबारे सामाजिक सञ्जालमा स्टाटस लेखेर उनले जीवन त्यागेको परिवारीक स्रोतले बताएको छ । सात वर्षदेखि प्रहरी, वडा कार्यालय, स्थानीय न्यायिक समिति,जिल्ला अदालत र उच्च अदालत सम्म पुगेर न्याय खोजिरहेकी जानकी लामो समय सम्म न्याय नपाउँदा गहिरो मानसिक तनावमा परेकी थिइन् ।
सामाजिक सञ्जालमा लेखिएको स्टाटसमा उनले परिवारको अस्वीकार,सामाजिक बहिष्कार र कानुनी प्रक्रिया प्रतिको निराशा व्यक्त गरेकी छिन् । छोराछोरीबाट टाढा पारिएको पीडाले आफूलाई झन् एक्लो बनाएको उनले उल्लेख गरेकी थिइन् ।
जानकीका श्रीमान् चन्द्र ढकाल रोजगारीका लागि भारतमा बस्दै आएका थिए । सात वर्षअघि उनले दोस्रो विवाह गरेको थाहा पाए पछि जानकी न्याय खोज्दै सदरमुकाम मंगलसेन पुगेकी थिइन् । सोही घटना पछि सुरु भएको उनको संघर्ष विभिन्न निकायमा अल्झिँदै लामो समय सम्म चलि रहयो । करिब तीन वर्षअघि जिल्ला अदालत अछाममा बहुविवाह सम्बन्धी मुद्दा दर्ता भए पनि प्रमाण नपुगेको भन्दै फैसला जानकीको विपक्षमा भएको थियो ।
जसले उनको मनोबल झन् कमजोर बनाएको आफन्तले बताएका छन । पछि उच्च अदालतले जिल्ला अदालतको फैसला उल्ट्याउँदै बहुविवाह भएको ठहर ग¥यो । श्रीमान् तथा उनकी कान्छी श्रीमतीलाई सजाय सुनायो । सजाय बराबरको रकम तिरेपछि श्रीमान् जेल नबसी बाहिरिए ।
त्यसपछि जानकीको जीवन झन् असुरक्षित बन्दै गएको परिवारले बताएका छन । उनी पटक–पटक मंगलसेन स्थित सेफ हाउसमा पीडितका रूपमा बस्न बाध्य भइन । त्याँहा उनले सिलाइकटाइ सिकिन् र मनोपरामर्श पनि लिइन् ।
अदालतको फैसला पछि श्रीमानले सम्बन्ध विच्छेदको मुद्दा दायर गरे । प्रेम विवाह गरेकी जानकीले सम्बन्ध विच्छेद नभई परिवारको साथ खोजिरहेकी थिइन् । छोराछोरीसँग भेटघाटमा
रोक लगाइए पछि उनी गहिरो पीडामा परिन् । यही अवस्थाले उनलाई सबैभन्दा ठूलो चोट पुगेको आफन्तले बताएका छन । चन्द्र ढकालले जनाकीसँग प्रेम विवाह गरेका थिए ।
जानकीका तीन सन्तान छन् । चन्द्रले भारतमा अर्की महिलासँग विवाह गरेपछि जानकीलाई तनाव दिन थालेको जानकीका काका तथा कमलबजार नगरपिालिका वडा नम्बर ५ का अध्यक्ष समेत रहेका सत्यराज तिमिल्सेनाले बताए ।
श्रीमानले अर्को विवाह गरेपछि परिवारका अन्य सदस्यले पनि बेवास्ता गर्दै मानसिक तनाव दिएकाले देहत्याग गर्ने निर्णयमा पुगेको जानकीले फेसबुकमा लेखेकी छिन् । श्रीमान् र परिवारको शारीरिक र मानसकि तनाव झेल्न नसकेर यो निर्णयमा पुगेको उनले लेखेकी छिन । जानकीको शव जिल्ला अस्पतालमा राखिएको छ । परिवारका सदस्यले दोषी पक्ष उपस्थित नभए सम्म शव नउठाउने अडान लिएका छन ।
