चैत्त ०८ धनगढी । धनगढीमा साहित्यिक पत्रकारिताको अवस्था र चुनौति बारे पत्रकारहरुसँग प्रादेशिक संगोष्ठी गरिएको छ । सुदूरपश्चिम प्रज्ञा–प्रतिष्ठानको आयोजना तथा मिडिया नेपालको सहकार्यमा उक्त कार्यक्रम गरिएको हो ।
साहित्यिक पत्रकारिता भन्दा आम पत्रकारिता पुरानो भएता पनि वास्तविक विकास हुन नसकेको प्रति पत्रकार तथा संगोष्ठी कार्यक्रमको कार्यपात्रो प्रस्तोता चित्राङ्ग थापाले चिन्ता व्यक्त गरे । पछिल्लो समयका युवा पुस्ताले साहित्यिक पत्रकारितालाई नजर अन्दाज गरेको र सरकारको तर्फबाट समेत यसको विकासका लागि कुनै पहल हुन नसकेको अवस्था रहेको उनले बताए ।
सुदूरपश्चिममा विगतमा गुगुल्डी, सुदूर चिनारी जस्ता दर्जनौं साहित्यिक पत्रिका प्रकाशन भएता पनि पछिल्लो समयमा आर्थिक अभावसँगै पाठकको अभावले गर्दा साहित्यिक पत्रकारिता र पत्रिका दुवै ओझेलमा परेको पत्रकार नारायण अवस्थीले बताए । त्यसैगरी पत्रकार महासंघ सुदूरपश्चिम प्रदेशका महासचिव शिवराज भट्टले सरकारले आगामी दिनमा विशेष पहल चाल्नु पर्ने देखिएको बताए ।
कार्यक्रममा बोल्दै सामाजिक विकास मन्त्री मेघराज खड्काले साहित्यिक पत्रकारिता धरापमा पर्नुको मुख्य कारण साहित्यिक पत्रकारितालाई पाठकको अभाव हुनु भएको बताए ।
कार्यक्रमका सभाध्यक्ष तथा सुदूरपश्चिम प्रज्ञा प्रतिष्ठानका उपकुलपति डा.टि एन जोशीले आफूले पत्रकारिता गर्दा साहित्यिक पत्रकारितालाई विशेष ध्यान दिएको र क्याम्पस तहमा पढ्दै गर्दा पनि साहित्यिक पत्रिकाहरू प्रकाशन गर्दै आएको बताए ।
आज पनि साहित्य क्षेत्रको विकाससँगै साहित्यिक पत्रकारिताको विकासका लागि तत्पर रहेको बताउदै उनले सबैले यसमा हातेमालो गरेर अगाडि बढ्नु पर्ने बताए । साहित्यिक पत्रकारिताको नयाँ अभियान सुदूरपश्चिमबाट सुरुवात गर्नुपर्ने डा. जोशीले बताए ।
कार्यक्रममा पत्रकार महासङ्घ कैलालीका निवर्तमान अध्यक्ष हिमालय जोशी, पत्रकार महासंघ कैलालीका निवर्तमान अध्यक्ष जगत साउद, पत्रकार नारायण अवस्थीसँगै कैलालीमा पत्रकारिता गर्दै आएका पत्रकारहरूको उपस्थिति रहेको थियो ।
