साउन ०५ चितवन । सिमलताल दुर्घटनामा लेदो सहितको पहिरोले बगाएर त्रिशूलीमा हराइरहेका यात्रु र बस खोज्न भारतबाट आधुनिक उपकरण सहितको टोली नेपाल आएको छ । नेपाल सरकारको अनुरोधमा भारतीय राष्ट्रिय विपद् रेस्पोन्स बलका १२ जनाको टोली दुर्घटनास्थल सिमलतालबाट नारायणीमा यात्रुहरुको खोजी गर्न आएको हो ।
टोलीले आइएतबार देखि काम सुरु गर्ने भएको छ । भारतीय उद्धार टोली सुनौली नाका हुँदै चितवन आइपुगेको हो । चितवनका प्रमुख जिल्ला अधिकारी इन्द्रदेव यादवका अनुसार १२ जनाको प्रविधियुक्त टोलीलाई आईतबार प्रशासनले घटनाको विस्तृत जानकारी गराए पछि उनीहरु घटनास्थलबाट खोजी कार्यमा जुट्ने छ् । यद्यपि कति समय खोजी गर्छन् भन्ने अहिले नै यकिन नभएको प्रमुख जिल्ला अधिकारी यादवले बताएका छन ।
दुर्घटना भएको मिति अघिल्लो शुक्रबारदेखि नै खोजी कार्यमा खटिएका नेपाली सुरक्षाकर्मी तथा उद्धार टोलीसँग समन्वय गरि खोजी कार्य गरिने प्रजिअ यादवले बताए । आज दिउँसो घटनाबारे जानकारी गराएर दुर्घटनास्थल जाने उनले जानकारी दिए ।
गत शुक्रबार ६५ जना यात्रु बोकेको काठमाडौँबाट गौर जान लागेको गढपति यातायात र बीगञ्जबाट काठमाडौँ हिँडेको एञ्जल यातायातको बसलाई सिमलतालमा माथिबाट आएको लेदो सहितको पहिरोले त्रिशूलीमा खसाएको थियो । तीन जना यात्रुले पौडिएर ज्यान बचाएका थिए भने बाँकी बेपत्ता भएका थिए ।
बेपत्ता मध्ये शुक्रबार बेलुका सम्म २३ जना यात्रुको शव नेपालको नारयाणी किनार र भारत समेतका नदी किनाराबाट भेटिएका छन् । बाँकी यात्रु र दुईवटा बसको अझै पत्तो लागेको छैन ।
