जेठ २२ काठमाडौं । मुगु र हुम्लाका २८ जना बालबालिकालाई काठमाडौं लैजाँदै गरेका एक जनालाई प्रहरीले सुर्खेतबाट पक्राउ गरेको छ । सोमबार राति १२ बजे वीरेन्द्र नगरस्थित तीनकुने चोकबाट २८ जना बालबालिका सहित नाम्गेल छिरिङलाई सुर्खेत प्रहरीले पक्राउ गरेको हो । आर्थिक अवस्था कमजोर भएकाले उनीहरूलाई काठमाडौंमा आवास सहितको शिक्षा दिने भनेर लैजान लागेको छिरिङले बयान दिएको सुर्खेत प्रहरी प्रमुख एसपी रुपेश खड्काले जानकारी दिए ।
ती बालबालिकालाई बाबुआमाकै आग्रहमा आफूले काठमाडौं लैजान लागेको छिरिङले बताएको एसपी खड्काले जानकारी दिए । काठमाडौंको कुन शिक्षालयमा अध्ययनका लागि लैजान लागेको भन्ने कुराचाहिँ नखुलेको उनले बताए । खड्काका अनुसार धेरैजसो बालबालिकालाई सम्बन्धित वडा कार्यालयले सिफारिस पनि बनाइ दिएको उनले जानकारी गराए । बालबालिका कुन पालिका र कति नम्बर वडाका हुन् भन्ने विषयमा भने प्रहरीले खुलाएको छैन ।
यस विषयमा थप अनुसन्धान भइरहेको एसपी खड्काले जानकारी गराएका छन । उनका अनुसार राति नियन्त्रणमा लिईएका बालबालिकालाई तत्काल व्यवस्थापनको लागि कर्णाली प्रदेशको सामाजिक विकास मन्त्रालयको जिम्मा लगाइएको थियो । तत्काल हामीले बालबालिकाको व्यवस्थापनको लागि सामाजिक विकास मन्त्रालयको जिम्मा दिएका छौं, साथमा लिन लागेका व्यक्तिलाई नियन्त्रणमै राखेका छौं, एसपी खड्काले भने ।
सामाजिक विकास मन्त्रालयका सामाजिक विकास महाशाखा प्रमुख अनीता ज्ञवालीले ती बालबालिकालाई आ–आफ्नो घरमा फिर्ता गरिने बताइन् । उनका अनुसार २८ जना मध्ये १२ जना बालक छन् भने १६ जना बालिका छन् । सम्बन्धित निकायसँगको सहकार्यमा बालबालिकाको खाना र आवासको व्यवस्थापन गरिएको उनले जानकारी गराईन ।
प्रहरीले आफ्नो तर्फबाट अनुसन्धान गर्दैछ, हामीले समन्वय गरेर तत्काल सुर्खेत बस्न व्यवस्थापन गरेका छौं, उनले भनिन् । कानुनी रुपमा बालबालिकालाई यत्तिकै कसैसँग छोड्न नमिल्ने बताउदै उनले घर फर्काउनु पर्ने बताईन ।
