पौष १६ धनगढी । भारत– नेपाल अन्तराष्ट्रिय काव्योत्सवमा नेपाली लेखकका ३ वटा कृतीहरुको विमोचन गरिएको छ । भारतको पिथौरागढ, उत्तराखण्डमा सम्पन्न भारत– नेपाल अन्तराष्ट्रिय काव्योत्सवमा नेपालबाट सहभागी लेखकहरु कैलाश पाण्डेयको एकलव्यको देशमा , कृष्ण सिंह पेलाको फूलको प्रहार र गणेश नेपालीको एकलव्य गजल संग्रहको विमोचन गरिएको हो । यही पौष ७ र ८ गते अर्थात डिसेम्बर २३ र २४ गते दुई दिन आयोजीत भारत– नेपाल अन्तराष्ट्रिय काव्योत्सव समारोहमा नेपाल र भारतका दुई दर्जन बढी साहित्यकारहरूले कविता र गजल वाचन गरेको सुदूरपश्चिमाञ्चल साहित्य समाजका अध्यक्ष तिर्थराज पाण्डेले जानकारी गराए ।
उनले नेपालबाट सहभागी कैलाश पाण्डेय, कृष्ण सिंह पेला र गणेश नेपालीका कृतिहरूको कार्यक्रमका प्रमुख अतिथी सुदूरपश्चिम प्रदेशका निवर्तमान मूख्यमन्त्री राजेन्द्र सिंह रावल र पुस्तकालयका अध्यक्ष डा. पिताम्बर अवस्थीले संयुक्त रुपमा विमोचन गरेको जानकारी गराए । साहित्यकार हेमबाबु लेखकले तीनओटै कृतिहरूको समिक्षात्मक टिप्पणी गरेको समेत अध्यक्ष पाण्डेले जानकारी गराए । ज्ञानप्रकाश संस्कृत पुस्तकालयको आयोजनामा पुस्तकालयका अध्यक्ष डा. पिताम्वर अवस्थीको अध्यक्षतामा र सुदूरपश्चिम प्रदेशका निवर्तमान मूख्यमन्त्री राजेन्द्र सिंह रावलको प्रमुख आतिथ्यतामा सम्पन्न भएको अन्तराष्ट्रिय काव्योत्सव समारोहको कवि तथा साहित्यकार इन्जिनियर ललित सौर्यले सञ्चालन गरेको अध्यक्ष पाण्डेले जानकारी गराए ।
त्यसैगरी समारोहका प्रमुख अतिथी निवर्तमान मूख्यमन्त्री राजेन्द्र सिंह रावलले कुमाऊ र सुदूरपश्चिम प्रदेशका सामाजिक साँस्कृतिक ऐतिहासिक र भाषिक साझा विरासतहरूको उन्नयन, संरक्षण र सम्बर्द्धन हुन अति आवश्यक भएको बताएको उनले जानकारी गराए । उनका अनुसार प्रमुख अतिथी रावलले महाकाली नदि वारि र पारीको मौलिक साझा सभ्यता अहिलेसम्म पनि प्रकाशमा आउन नसकेकोले बंग्याईएको इतिहासमा भ्रमित नहुन दुबैतिरका जनताले जागरुक हुनु पर्ने बताएका थिए । पिथौरागढको समाचारपत्र सन्डेपोस्टका पत्रकार दिनेशचन्द्र पन्तले नेपाल र भारतको सम्बन्धलाई मजबुत बनाउन दुबै देशका साहित्यिक सांस्कृतिक संस्थाहरूले महत्वपूर्ण भूमिका निर्वाह गर्न सक्ने भएकाले त्यस्तो दुई देशिय संगठनको आवस्यकता रहेको बताएका थिए ।
उनले विश्व परिघटनाहरूको हवाला दिदै युक्रेन रसियाको युद्धमा त्यहाका जनताको सुरक्षाका लागि युरोपतिर लागेको बताउदै इजरायल र फिलिस्तिन युद्धमा फिलिस्तिनीहरू सुरक्षा खोज्दै अरबतिर लागेको बताएका थिए । उनले नेपाल र भारत मात्र नेपाली र भारतीयहरूको लागि सुरक्षाको आवश्यकता पर्दा सहयोग गर्न तयार भएको बताउदै नेपाली र भारतीयहरूका लागि जाने ठाउँ अन्यत्र कहिँ नभएको बताए । उनले दुबै देशका लागि प्रगाढ मित्रता अपरिहार्य रहेको समेत बताएको अध्यक्ष पाण्डेले जानकारी गराए ।
