असार १६ दाङ । दाङमा आफ्नो घरमा कोठा भाडामा बस्ने व्यक्तिलाई दलित भनेर विभेद गरेको आरोपमा एक जनालाई प्रहरीले पक्राउ गरेको छ । पीडितको उजुरीको आधारमा प्रहरीले घोराही उप महानगरपालिका वडा नम्बर–१७ का ताराप्रसाद पोखरेललाई पक्राउ गरेको हो ।
पोखरेलले आफ्नो घरमा डेरामा बसेका अंगराज परियार र महेन्द्र बिश्वकर्मालाई जातकै आधारमा विभेद गर्दै कोठा छाड्न दबाव दिएको आरोप लागेको छ । परियारका अनुसार दलित भएको थाहा पाए पछि शुक्रबार पोखरेलले कोठा छाड्न दबाब दिएका हुन् ।
भाडामा बस्ने परियार र विश्वकर्माले शुक्रबार नै प्रहरीमा उजुरी दिए पछि प्रहरीले पोख्रेललाई पक्राउ गरेको हो । डीएसपी राजनकुमार गौतमका अनुसार पीडित पक्षको जाहेरी आएमा अनुसन्धान सुरु हुने छ । प्रेस सेन्टर नेपाल र दलित पत्रकार संघले परियार र विश्वकर्मामाथि भएको घटनाको बिरोध जनाउँदै दोषीमाथि कारबाहीको माग गरेका छन् ।
