चैत्र २७ धनगढी । सुदूरपश्चिम प्रदेशमा ७ दिनमा सक्रिय सङ्क्रमितको सङ्ख्या १ सय १ पुग्यको छ । भारतसँग सीमा जोडिएका सुदूरपश्चिम प्रदेशका विभिन्न नाकाबाट नेपाल फर्कनेहरूमा एक सातामा १ सय १ जनामा कोरोना संक्रमण भएको हो ।
स्वास्थ्य निर्देशनालयका अनुसार प्रदेशभर २२ जनामा कोरोना सङ्क्रमण पुष्टि भएको छ। सङ्क्रमित सबै भारतबाट फर्किएका व्यक्ति छन्। विभिन्न नाकाबाट आएका ७ सय १६ जनाको परीक्षण गर्दा २२ जनामा सङ्क्रमण पुष्टि भएको हो।
भारतबाट फर्किनेमा सङ्क्रमण देखिए पछि नाका थप व्यवस्थित गर्न चाँडै नै जिल्लास्थित सङ्कट व्यवस्थापन केन्द्रको बैठक बसेर निर्णय गरिने जिल्ला प्रशासन कार्यालय कैलालीका सूचना अधिकारी शिवराज जोशीले बताए। उनले भारतबाट भित्रिनेसँगै कोरोना अत्यधिक फैलिने खतरा रहेको उल्लेख गरे। “अब व्यक्ति आफैँले सजगता अपनाउन जरुरी छ,” जोशीले भने ।
सङ्क्रमण बढेसँगै सात दिनभित्रै सुदूरपश्चिम प्रदेशमा सक्रिय सङ्क्रमितको सङ्ख्या १ सय १ पुगेको छ। कैलालीमा ८६, कञ्चनपुरमा सात, बैतडीमा छ, दार्चुलामा दुई जना सक्रिय सङ्क्रमित रहेको निर्देशनालयले जनाएको छ।
सुदूरपश्चिम प्रदेशको पहाडी जिल्लामा बिसु पर्व मनाउन अहिले दैनिक हजारौको सङ्ख्यामा विभिन्न नाका भएर नेपालीहरू स्वदेश भित्रिरहेका छन्। शनिबार मात्रै गौरीफन्टा नाकाबाट ९८३ जना फर्किएका थिए । तीमध्ये ३ सय ७६ जनाको एन्टिजेन विधिबाट परीक्षण गरिएको थियो।
