चैत्र २७ कञ्चनपुर । विश्वमै दुर्लभ मध्येको एक जनावर बाह्रसिंगाको झुण्ड देख्न पाइने कञ्चनपुरको शुक्लाफाँटा राष्ट्रिय निकुञ्ज भित्र रहेका तालहरु संरक्षण अभावमा पुरिन थालेका छन् । शुक्लाफाँटा राष्ट्रिय निकुञ्ज भित्र रहेका रानीताल, कालीकिच ताल र शिकारी ताल संरक्षणको अभावमा पुरिन थालेका हुन ।
लामो समय देखि जलकुम्भीले भरिँदा तालको अस्तित्व सङ्कटमा परेको छ । निकुञ्जका सूचना अधिकारी पुरुषोत्तम वाग्लेले तालको संरक्षण र सम्वद्र्धन आवश्यक रहेको बताए । गर्मीयाममा वन्यजन्तुको प्यास मेटाउन निकुञ्ज भित्र धेरै स्थानमा कृत्रिम तलाउ बनाएर सोलारबाट पानी भर्ने गरिएको बताउदै उनले “निकुञ्ज भित्रका एक दर्जन बढी ताल पुरिँदै गए पनि बजेट अभावका कारण सरसफाइ गर्न नसकिएको बताए ।
निकुञ्ज भित्र कृत्रिम र प्राकृतिक गरी १ सय २० वटा ताल तलैया रहेको उनले जानकारी गराए । चालु आर्थिक वर्षमा निकुञ्जको पुँजीगत बजेट कम विनियोजन हुँदा व्यवस्थापनमा समस्या भएको उनले बताए । वन्यजन्तुका लागि हरेक वर्ष घाँसे मैदान व्यवस्थापन हुँदै आएको बताउदै उनले यस वर्ष घाँसे मैदान व्यवस्थापनका लागि सात लाख रुपैयाँ मात्र विनियोजन भएको बताए ।
निकुञ्ज भित्र मुलुककै ठूलो ५५ वर्गकिलोमिटर क्षेत्रफलमा फैलिएको घाँसे मैदान रहेको उनले बताए । गत वर्ष निकुञ्जको पुँजीगत बजेट दुई करोड रुपैयाँ रहेपनि चालु आर्थिक बर्षमा बजेट ३५ लाख रुपैयाँमा झरेको उनले बताए ।
पाँच हजार ४ सय हेक्टर घाँसे मैदान व्यवस्थापन गर्नुपर्ने भए पनि बजेट अभावले ५० हेक्टरको मात्रै व्यवस्थापन गर्न सकिएको सूचना अधिकारी वाग्लेले बताए । विश्वमै दुर्लभ दुई हजार ४ सय बढीको बाह्रसिङ्गाको झुण्ड र थोरै क्षेत्रफलमा ४३ वटा पाटे बाघ रहेको शुक्लाफाँटामा ४ सय ५० बढी प्रजातिका चराचुरुङ्गी रहेको बाग्लेले जानकारी गराए ।
