फागुन ११ बाजुरा । बाजुरामा फागुन २१ गते हुने प्रतिनिधिसभा सदस्य निर्वाचनका लागि १ हजार ४ सय ८२ जना अस्थायी मतदाता कायम गरिएको छ । जिल्ला निर्वाचन कार्यालय बाजुराले आसन्न निर्वाचनका लागि अन्तिम अस्थायी मतदाता नामावली प्रकाशन गरी १ हजार ४ सय ८२ जना अस्थायी मतदाता कायम गरिएको हो ।
अस्थायी मतदाता नामावलीमा सरकारी कर्मचारी, नेपाली सेना, नेपाल प्रहरी वा सशस्त्र प्रहरी, कारागारमा रहेका थुनुवा र कैदी, निर्वाचनमा खटिएका कर्मचारी र सुरक्षाकर्मी, सरकारको स्वीकृति लिई सञ्चालन भएको वृद्धाश्रममा बसेका व्यक्ति र आयोगले तोकेका अन्य व्यक्तिको नाम समावेश हुने व्यवस्था रहेको छ ।
जिल्लामा कैदीबन्दी र वृद्धाश्रमका व्यक्ति नहुँदा अस्थायी मतदाता नामावलीमा सरकारी कर्मचारी र सुरक्षाकर्मी मात्रै रहेको जिल्ला निर्वाचन अधिकारी भीम बहादुर शाहीले जानकारी गराएका छन । अस्थायी मतदाताका लागि जिल्लामा एक मात्रै मतदान केन्द्र मार्तडी स्थित डिभिजन वन कार्यालय तोकिएको उनले बताए । उक्त मतदान केन्द्र निर्वाचनमा नखटिएका कर्मचारी र सुरक्षाकर्मीका लागि निर्धारण गरिएको उनले बताए ।
निर्वाचनमा खटिएका कर्मचारी र सुरक्षाकर्मीले अस्थायी मतदाता नामावलीमा नाम भएमा सम्बन्धित केन्द्रमा मतदान गर्न
पाउने छन । अस्थायी मतदाताले प्रतिनिधि सभाको समानुपातिक तर्फ मात्र मत हाल्न पाउने व्यवस्था रहेको छ । अस्थायी मतदातालाई प्रत्यक्ष तर्फका उम्मेदवारलाई भोट हाल्ने सुविधा नरहेको जिल्ला निर्वाचन कार्यालयले जनाएको छ ।
