फागुन ०९ बाजुरा । बाजुराका नौ वटै स्थानीय तहका विभिन्न गाउँबस्तीमा मतदाता शिक्षा कार्यक्रम सञ्चालन गरिएको छ । आगामी फागुन २१ गते हुने प्रतिनिधिसभा सदस्य पदको निर्वाचनमा सहज रूपमा मतदान गर्ने उद्देश्यले गाउँ–टोलमा मतदाता शिक्षा कार्यक्रम सञ्चालन गरिएको हो ।
जिल्ला निर्वाचन कार्यालय बाजुराले मतदाताले आफूले रोजेको उम्मेदवारलाई सही तरिकाले मतदान गर्न सकुन् भन्ने उद्देश्यले गाउँबस्तीमा मतदाता शिक्षा कार्यक्रम सञ्चालन भइरहेको जानकारी गराएको हो । हिमाली गाउँपालिका वडा नम्बर–६, धीमकी सुर्जकला रोकायाले मतदाता शिक्षा पाएसँगै आफू ढुक्कका साथ सही तरिकाले मतदान गर्न सक्षम भएको बताईन ।
आगामी निर्वाचनमा आफ्नो गाउँको विकास गर्न सक्ने उम्मेदवारलाई ढुक्कका साथ मतदान गर्ने तयारी गरेको रोकायाले बताईन । जिल्ला निर्वाचन कार्यालय बाजुराका प्रमुख अङ्गत महतले प्रत्येक वडामा एक–एक जना मतदाता शिक्षक नियुक्त गरी घरदैलो अभियान सञ्चालन गरिएको जानकारी गराए ।
मतदाता शिक्षकहरूले गाउँघरमा पुगेर मतदान गर्ने तरिका, मतपत्रमा सही छाप लगाउने विधि, बदर मत हुन नदिन अपनाउनु पर्ने सावधानी तथा मतदान समयबारे जानकारी दिँदै आएको उनले बताए । कार्यक्रमका कारण मतदातालाई फागुन २१ गते हुने निर्वाचनमा मतदान गर्न सहज भएको उनले बताए ।
यसपटक जिल्लामा बदर मत कम हुने अपेक्षा गरिएको उनले बताए । बाजुरामा ४५ हजार ४ सय २८ जना पुरुष, ४२ हजार ४ सय ३१ जना महिला र अन्य दुई जना गरी कुल ८७ हजार ८ सय ६१ जना मतदाता रहेको उनले जानकारी गराए । मतदानका लागि जिल्लामा ७७ वटा मतदानस्थल र १ सय १८ वटा मतदान केन्द्र निर्धारण गरिएको उनले जानकारी गराए ।
