माघ १८ बाजुरा । बाजुराका भेडाबाख्रा पालक किसानलाई मतदान गर्न समस्या हुने भएको छ । बाजुराका हिमाली, जगन्नाथ, स्वामीकार्तिक खापर र बुढीनन्दा नगरपालिकाका अधिकांश भेडाबाख्रा पालक किसानलाई मतदान गर्न समस्या हुने भएको हो ।
गत कात्तिकको पहिलो साता देखि भेडीगोठ लिएर बेँसी झरेका उनीहरू वैशाखको पहिलो सातादेखि मात्र गाउँ फर्किने गरेकाले मतदान गर्न समस्या हुने भएको हो । प्रतिनिधि सभा सदस्यको निर्वाचन आगामी फागुन २१ गते हुने भएकाले निर्वाचनमा उनीहरू भेडासँगै औलमा रहने भएकाले उनीहरूलाई चुनावको बेला गाउँमा फर्किएर मतदान गर्न समस्या भएको हो ।
उनीहरूको समस्या समाधान गर्न अहिले कुनै पनि राजनीतिक दलहरूले केही पहल चालेको देखिएको छैन । प्रायः मतदाताहरू अहिले भेडाबाख्रा चरिचरनको सिलसिलामा अछाम बाजुराको तल्लो क्षेत्रका विभिन्न स्थानमा रहेका छन् । कात्तिक देखि हिमाली भेगमा निकै चिसो हुने भएकाले चिसो छल्न र भेडाबाख्रालाई चरिचरन गर्नका लागि अछामका विभिन्न ठाउँमा आएको बुढीनन्दा नगरपालिका स्थानीय प्रेमसिंह गुरुङले बताए ।
वैशाखमा मात्र गाउँ फर्किने बताउदै उनले अहिले भेडाबाख्रा लिएर गाउँमा जाने सम्भावना नभएको बताए । गाउँमा उम्मेदवार गएको बताउदै उनले मतदाता भेडाबाख्रासँगै बेसीतीर भए पनि उनीहरूले समस्या नबुझेको बताए ।
कसैले समस्या बुझिदिने हो भने सहज हुने बताउदै उनले असोजमा निर्वाचन भए राम्रो हुने बताए । कि वैशाख,जेठमा निर्वाचन भए राम्रो हुने बताउदै उनले अहिले निर्वाचन फागुनमा भएकाले निर्वाचनमा गाउँमा गएर मतदान गर्न निकै समस्या भएको बताए ।
बाजुराको पूर्वीउत्तर क्षेत्रका स्थानीयको भेडापालन पेशालाई पुर्खौली पेशाको रूपमा लिन सकिने बताउदै उनले पहिले गाउँमा सडकको पहुँच नहुँदा उनीहरूले भेडाबाख्राको भरमा गाउँ बस्तीमा नुन, तेल चामल ढुवानी गर्ने गरेको बताए । भेडामा दैनिक उपभोग्य सामग्री ढुवानी गरी अधिकांश गाउँबस्तीमा बिक्री गर्ने गरेको उनले सुनाए ।
अहिले सबै गाउँ बस्ती सडक सञ्जालको पहुँचमा भएपछि त्यो व्यवसाय बिस्तारै सङ्कटमा पर्ने गरेको उनले बताए । त्यति मात्र नभई अहिले भेडापालक किसानलाई भेडापालन गर्नसमेत निकै समस्या हुन थालेको उनले बताए ।
गाउँ बस्तीमा रहेका वन, जङ्गल सबै अहिले सामुदायिक भएपछि भेडाबाख्रा पालनमा सङ्कट आएको उनले बताए । भेडाबाख्रा चरिचरन गर्नका लागि ठुलो क्षेत्रमा रहेको वन चाहिने बतााउदै उनले सबै वन सामुदायिक भएकाले अहिले े बिस्तारै भेडापालन छोड्नुपर्ने अवस्था आएको बताए ।
हिमाली गाउँपालिकामा १ सय ३८ भेडीगोठमा छ हजार, स्वामीकार्तिकमा १ सय १५ परिवारको भेडीगोठमा आठ हजार, जगन्नाथमा गाउँपालिकाको १ सय २० परिवारको भेडीगोठमा सात हजार २९ र बुढीनन्दा नगरपालिकाको तीन सय भेडीगोठमा झन्डै बिस हजार भन्दा बढी भेडाबाख्रा रहेको उनले जानकारी गराए ।
हिमाली गाउँपालिकाको भेटेरिनरी शाखाका प्राविधिक गौरी कार्कीले बाजुरामा ६ सय ७३ भेडीगोठका झन्डै ४१ हजार २९ भेडाबाख्रा रहेको बताए । यस भन्दा पहिला भेडापालन गर्नेको सङ्ख्या बढी भएको बताउदै उनले यतिबेला कमी आएको बताए ।
अधिकांश स्थानीयले जागिरको खोजी गर्नु र भेडापालन गर्नका लागि चरिचरन गर्ने ठाउँको अभाव भएका कारण पछिल्लो समयमा भेडाबाख्रा पाल्नेको सङ्ख्यामा पनि कमी आएको उनले बताए ।
