माघ ०७ डडेल्धुरा । डडेल्धुराको नवदुर्गा गाउँपालिका वडा नम्बर–३ मा निर्माणाधीन मोटरेबल पुल १२ वर्षदेखि अलपत्र परेको छ ।
नवदुर्गा र गन्यापधुरा गाउँपालिकालाई जोड्ने सकायल खोलामा पुल निर्माणका लागि १२ वर्षअघि ठेक्का लगाइएको भए पनि हालसम्म काम सम्पन्न नहुँदा मोटरेबल पुल १२ वर्षदेखि अलपत्र परेको हो ।
सडक डिभिजन कार्यालय कुलपाते, डोटीले चाँदनी कन्स्ट्रक्सन प्रालिलाई पुल निर्माणको जिम्मा दिएको भए पनि ठेकेदारले स्ल्याब सम्मको काम मात्र सम्पन्न गरेको छ । त्यसयता निर्माण कार्य अघि बढ्न सकेको छैन ।
बुधबार जिल्ला प्रशासन कार्यालयमा सडक डिभिजन कार्यालय डोटीका प्रमुख र निर्माण कम्पनीका सञ्चालकलाई छलफलका लागि बोलाइएको प्रमुख जिल्ला अधिकारी विष्णुप्रसाद कोइरालाले जानकारी दिए ।
उनका अनुसार मंगलबार मतदानस्थल निरीक्षणका क्रममा पुलको अवस्था देखे पछि निर्माण सम्पन्न गराउन पहल सुरु गरिएको हो । स्थानीय नागरिकको निरन्तर खबरदारी र सञ्चार माध्यममा आएका समाचार पछि गत वर्ष पनि प्रमुख जिल्ला अधिकारीले निर्माण कार्य छिटो सम्पन्न गर्न निर्देशन दिएका थिए ।
त्यसपछि पनि पुल निर्माणले गति लिन नसकेको उनले बताए । २०८० सालमा निर्माण कार्य अन्तिम चरणमा पुगेका बेला सकायल खोलामा आएको बाढीले निर्माणाधीन संरचना बगाए पछि पुल अलपत्र परेको जनाइएको छ ।
