माघ ०६ धनगढी । कैलालीको टिकापुर नगरपालिका प्रमुख, उपप्रमुख विहीन भएको छ । नगरपालिकाका मेयर रामलाल डगौरा थारूले राजीनामा दिएपछि र उपमेयर खडक बहादुर शाह जग्गा हिनामिना काण्डमा मुछिएकाले टिकापुर नगरपालिका प्रमुख, उपप्रमुख विहीन भएको हो ।
कैलाली क्षेत्र नम्बर १ बाट प्रतिनिधि सभा सदस्यका लागि चुनाव लड्न प्रमुख डगौरा थारूले राजीनामा राजीनामा दिएका छन । २०७९ सालको स्थानीय चुनावमा उनले नागरिक उन्मुक्ति पार्टीबाट मेयर जितेका थिए ।
अहिले उनी नेपाली कम्युनिस्ट पार्टी नेकपाको तर्फबाट उम्मेदवार बनेका हुन । २०८४ सालमा हुने चुनावमा प्रदेश सभा सदस्य उठ्ने योजना बनाएको बताउदै उनले अहिले नै प्रतिनिधि सभाको चुनाव हुने भएकाले पार्टीले विश्वास गरेर टिकट दिएको उनले बताए ।
त्यसैले नयाँ जिम्मेवारी लिन आफु तयार भएको उनले बताए । नियम अनुसार मेयरले उपमेयरलाई लिखित राजीनामा बुझाउनु पर्ने भए पनि टीकापुरमा उपमेयर पद प्राविधिक रूपमा खाली जस्तै छ । नगर विकास समितिको जग्गा घोटालामा संलग्न भएको भन्दै अख्तियारले मुद्दा चलाए पछि उपमेयर खडक बहादुर शाह निलम्बनमा छन् ।
दुई वर्ष देखि उनको मुद्दा किनारा नलागेकाले उपमेयरले गर्नुपर्ने धेरै कामहरू अलपत्र परेका छन् । उपमेयर विहीन बनेको नगरपालिकामा मेयरले पनि राजीनामा दिएपछि नेतृत्वविहीन भएको छ ।
