माघ ०४ धनगढी । विगत चार दशक देखि भाषा, साहित्य,कला,संस्कृति तथा धर्म–दर्शनको श्रीवृद्धिमा सक्रिय साहित्यकार तथा संस्कृतिविद पद्मराज जोशी ‘प्रभात’ को नाममा स्थापित पद्म प्रभात प्राज्ञीक पुरस्कार भारत उत्तराखण्ड राज्यको अल्मोडा निवासी साहित्यकार, इतिहासकार, पुरातत्वविद् तथा संस्कृतिविद् प्रो. डा. महेश्वर प्रसाद जोशीलाई र पद्म प्रभात पत्रकारिता पुरस्कार सुदूरपश्चिममा लामो समय देखि खोज पत्रकारितामा सक्रिय डी.आर. पन्त र पत्रकार गोविन्द रोस्यारा प्रदान गरिने भएको छ ।
प्रतिष्ठानको माघ ३ गते धनगढीमा बसेको बैठकको निर्णय अनुसार १ लाख ११ हजार १ सय ११ श्रपैया राशिको पद्म प्रभात प्राज्ञिक पुरस्कार २०८२ डा. जोशीले सन् १९६५ देखि प्राचीन इतिहास, संस्कृति र पुरातत्व विषयमा निरन्तर अनुसन्धान गर्दै मध्य हिमालय (गढवाल, कुमाउ र डोटी) क्षेत्रको इतिहास, पुरातत्व र संस्कृतिमा १ सय भन्दा बढी शोधपत्र प्रकाशित गरेका जोशीलाई प्रदान गरिने भएको हो ।
नेपाल–भारत हिमाली भू–भागको पाषाणकालीन प्रागइतिहास, भाषा उद्भव तथा विकास र ‘उत्तराखण्डमा गोर्खा शासनका २४ वर्ष’ विषयमा उल्लेखनीय अनुसन्धान योगदान पु¥याएको भन्दै उनलाई उक्त पुरस्कार समर्पण गरिने प्रतिष्ठानले जानकारी गराएको छ ।
त्यसैगरी पद्म प्रभात पत्रकारिता पुरस्कार २०८२ सुदूरपश्चिम प्रदेशमा लामो समय देखि खोज पत्रकारितामा सक्रिय डडेल्धुराका डी.आर. पन्त र कैलालीका पत्रकार गोविन्द रोस्यारालाई प्रदान गरिने भएको छ । त्यसैगरीै भुवनेश्वरी पद्म प्रभात प्रतिभा पुरस्कार कवि तथा साहित्यकार बैतडीका हिरा भट्टलाई समर्पण गरिने भएको छ ।
साहित्यकार श्रेष्ठप्रिया पन्थी, महाकाव्यकार मणिराज जोशी र साहित्यकार गणेशराज जोशी सदस्य रहेको छनौट समितिको सिफारिस अनुसार पुरस्कार घोषणा गरिएको प्रतिष्ठानका उपाध्यक्ष हरिलाल गिरिले जानकारी गराए । पुरस्कारहरू २०८२ सालको चैत्र नवरात्रिको अवसरमा समर्पण गरिने प्रतिष्ठानले जनाएको छ ।
