माघ ०२ डडेल्धुरा । आवश्यक आवेदन नपरे पछि डडेल्धुरामा निर्वाचन प्रहरी भर्नाको म्याद दुई दिन थप गरिएको छ । जिल्ला प्रशासन कार्यालय डडेल्धुराले माघ १ गतेसम्म तोकिएको आवेदन अवधि २ दिनका लागि थप गरेको हो ।
पौष २५ गते देखि माघ १ गते सम्मका लागि तोकिएको आवेदन अवधिमा दरखास्त दिनेहरूको संख्या न्यून भए पछि म्याद थप गरिएको हो ।
आगामी फागुन २१ गते हुने प्रतिनिधिसभा निर्वाचनलाई स्वतन्त्र, निष्पक्ष, भय–रहित र शान्तिपूर्ण वातावरणमा सम्पन्न गराउने उद्देश्य सहित निर्वाचन प्रहरी भर्ना आह्वान गरिएको भए पनि तोकिएको समय भित्र आवश्यक संख्यामा आवेदन नपरेपछि अतिरिक्त दुई दिन थप गरी आवेदन लिन थालिएको प्रशासनले जानकारी गराए ।
जिल्ला प्रशासन कार्यालय डडेल्धुराले डडेल्धुरामा निर्वाचन प्रहरीका लागि ९ सय ४४ जनाको कोटा तोकिएको जानकारी गराएको छ ।
माघ १ गतेसम्म ८ सय ७ जनाले मात्र आवेदन दिएको हुँदा १ सय ३७ आवेदन कम परेको र त्यसकारण म्याद थप गरिएको प्रशासन कार्यालयले जानकारी गराएको हो ।
