पौष ३० अछाम । अछामको साफेबगरमा आलु बालीमा डढुवा रोगको प्रकोप देखा परेको छ । अछामको साँफेबगरस्थित हातेमालो बहुउद्देश्यीय सहकारी संस्थाले लगाएको आलु बालीमा डढुवा रोगको प्रकोप देखा परेको हो । रोगको प्रकोपले फल नलाग्दै आलुका बोट सुक्न थालेपछि व्यावसायिक आलु कृषक चिन्तित बनेका छन् ।
सहकारीले खेती गरिएको आलु बालीमा डढुवा रोगको प्रकोप देखिएको हो । सहकारीले भाडामा प्रयोग गरेको कुल २० रोपनी जग्गा मध्ये करिब १० रोपनी क्षेत्रफलमा लगाइएको आलु बाली पूर्ण रुपमा सखाप भएको छ । संस्थाका अध्यक्ष सुरत भूलले डढुवा रोगका कारण सहकारीलाई तीन लाख रुपैयाँभन्दा बढीको क्षति पुगेको बताए ।
मौसममा आएको अचानक परिवर्तन, चिस्यान र निरन्तरको ओसिलो वातावरणका कारण रोग फैलिएको उनले बताए । किसानले धेरै मिहिनेत गरेर लगाएको बाली एकाएक नष्ट हुँदा ठुलो आर्थिक क्षति बेहोर्नु परेको अध्यक्ष भूलले बताए ।
डढुवा रोगको अवस्था बुझ्न तथा प्राविधिक सहयोगका लागि राष्ट्रिय कृषि आधुनिकीकरण कार्यक्रम कार्यान्वयन इकाई अछामका प्राविधिक पूर्ण प्रसाद ढुंगाना प्रभावित आलु बालीमा पुगेको जानकारी गराउदै उनले आलुमा देखिने डढुवा रोगका लक्षण, कारण र नियन्त्रणका उपायहरु बारे कृषकलाई जानकारी गराएको बताए ।
प्राविधिक ढुंगानाले डढुवा रोग लाग्दा आलुको पात कालो हुने, डाठ सुक्ने र अन्ततः बोटै नष्ट हुने समस्या देखिने बताए । समयमै रोग पहिचान गरी उपयुक्त विषादी प्रयोग गर्न सके क्षति न्यूनीकरण गर्न सकिने उनले बताए । आगामि दिनमा आलु खेती गर्दा असोज महिनामा गर्न सुझाव दिँदै उनले मौसम अनुकूल बाली व्यवस्थापन गर्न आग्रह गरेका छन ।
त्यसैगरी युनाईटेड अजोड इन्स्योरेन्स कम्पनी साँफेबगर शाखाका प्रमुख प्रेमराज रेग्मीले सहकारीले गरेको बिमा अनुसार क्षतिपूर्ति भुक्तानीका लागि बिमा कम्पनी मार्फत पहल गर्ने बताएका छन । उनले आवश्यक कागजात सङ्कलन र प्रक्रिया पूरा भए पछि बिमाबाट राहत उपलब्ध गराउन सहयोग गर्ने प्रतिबद्धता जनाएका छन ।
