ष २५ धनगढी । सुदूरपश्चिम प्रदेशको प्रमुख भन्सार नाका मध्येको एक त्रिनगर भन्सारको राजस्व संकलनमा कमी आएको छ । आयातमा गरिवट आउँदा गत वर्षको तुलनामा त्रिनगर भन्सारको राजस्व संकलनमा कमी आएको हो । विलासिताका सामान तथा उपभोग्य वस्तु आयातमा गिरावट आएकाले भन्सारको राजस्व संकलन प्रभावित भएको देखिएको छ । भन्सार अधिकृत प्रकाश तिमिल्सिनाले गत आर्थिक वर्ष र चालु आर्थिक वर्षको साउन देखि मंसिरसम्मको तथ्याङ्क तुलना गर्दा भन्सार राजस्व ५.१४ प्रतिशतले खुम्चिएको जानकारी गराए ।
गत आर्थिक वर्षको साउन देखि मंसिर सम्म प्रमुख २० वस्तुहरूबाट २ अर्ब ६० करोड ४३ लाख ८५ हजार रुपैयाँ राजस्व सङ्कलन भएको उनले जानकारी गराए । चालु आर्थिक वर्षको सोही अवधिमा यो रकम घटेर २ अर्ब ४७ करोड ४ लाख ६२ हजार रुपैयाँमा सीमित भएको छ । कैलाली भन्सार कार्यालयको राजस्वको मेरुदण्ड अझै पनि पेट्रोलियम पदार्थ देखिएको उनले बताए । अन्य वस्तुको आयात कम भए पनि डिजेल र पेट्रोलको आयातम बढेको देखिन्छ ।
चालु आर्थिक वर्षको समीक्षा अवधिमा डिजेल आयात ३.४१ प्रतिशतले बढेर १ अर्ब १५ करोड ६ लाख रुपैयाँ बराबरको राजस्व योगदान गरेको छ । त्यस्तै, पेट्रोलको आयातबाट ७२ करोड ३९ लाख रुपैयाँ राजस्व संकलन भएको छ, जुन गत वर्षको समीक्षा अवधिको तुलनामा २ प्रतिशतले बढी हो । समग्र व्यापारमा मन्दी देखिए पनि इन्धनको खपत नघट्नुले यातायात क्षेत्र चलायमान नै रहेको संकेत गरेको भन्सार अधिकृत तिमिल्सिनाले बताए ।
खाना पकाउने एलपी ग्याँसको राजस्वमा भने करिब ४ प्रतिशतको सामान्य गिरावट देखिएको उनले बताए । भन्सार नाकाबाट तयारी प्याकेटका खानेकुराको आयातमा गिरावट आएको छ । विगतमा भारतीय बजारबाट ठुलो मात्रामा भित्रिने दालमोठ, भुजिया, चमेना र पापड जस्ता वस्तुहरूको आयात चालु आर्थिक वर्षमा घटेको छ । दालमोठ र भुजियाबाट गत वर्ष साउन देखि मंसिर सम्म १५ करोड ८ लाख राजस्व सङ्कलन भएकोमा यस वर्ष उक्त अवधिमा जम्मा ४ करोड ९१ लाख रुपैयाँमात्र सङ्कलन भएको छ ।
यो भनेको ६७.४४ प्रतिशतको गिरावट हो । भारतीय पापडको आयात घटेको छ । गत वर्ष समीक्षा अवधिमा २ करोड ८८ लाख राजस्व भारतीय पापड आयातबाट भएको थियो । यस वर्ष सोही अवधिमा ९०.६४ प्रतिशतले राजस्व घटेर २६ लाख रुपैयाँमा खुम्चिएको छ । त्यसैगरी तयारी सुपको आयातमा पनि ६२.७२ प्रतिशतको गिरावट आएको छ । सडक निर्माणमा प्रयोग हुने बिटुमिन (अलकत्रा) को आयात भने १०७.९६ प्रतिशतले बढेको छ ।
गत वर्ष बिटुमिन आयातबाट २ करोड २९ लाख रुपैयाँ राजस्व उठेकोमा यस वर्ष ४ करोड ७६ लाख राजस्व सङ्कलन भएको छ । त्यसैगरी निजी घर वा भवन निर्माणमा प्रयोग हुने फिनिसिङ सेरामिक्स (टायल) र ग्रेनाइटको आयातमा भने भारी मन्दी छाएको छ । सेरामिक्सको राजस्व ६०.६९ प्रतिशत र ग्रेनाइटको राजस्व ३९.१४ प्रतिशतले घट्नुले घरजग्गा कारोबार र निजी आवास निर्माणमा मन्दी देखिएको हो ।
उद्योगतर्फ कागज तथा पेपरबोर्डको आयातमा १६७.२३ प्रतिशतको उछाल आएको छ । यसले प्याकेजिङ तथा मुद्रण उद्योगमा केही गतिविधि बढेको देखाउँछ । त्यसैगरी पशुपन्छीको दानाका लागि प्रयोग हुने भटमासको पिनाको आयात २३.८६ प्रतिशतले घट्नु र बस–ट्रकका टायरको आयात ९ प्रतिशतले घट्नुले कृषि तथा यातायात क्षेत्रमा केही शिथिलता रहेको देखाएको छ ।
