पौष १२ धनगढी । सरकारले बैतडीको मेलौली सहित सुदूरपश्चिम प्रदेशका चार वटा स्थानमा इलाका प्रशासन कार्यालय स्थापना गर्ने निर्णय गरेको छ । शुक्रबार बसेको मन्त्रिपरिषदको् बैठकले सुदूरपश्चिम प्रदेशका चार सहित देशभरका नौ वटा स्थानमा इलाका प्रशासन कार्यालय खोल्ने निर्णय गरेको हो ।
निर्णय अनुसार बैतडीको मेलौली, बाजुराको कोल्टी, डोटीको विपीनगर र दार्चुलाको गोकुलेश्वरमा इलाका प्रशासन कार्यालय स्थापना गरिने भएको हो । त्यसैगरी ताप्लेजुङको सिरिजंगा, डोल्पाको धो, मुगुको खत्याड, कालिकोटको रास्कोट र संखुवासभाको हिदानागढीमा पनि इलाका प्रशासन कार्यालय खोलिने भएको छ ।
मेलौलीमा इलाका प्रशासन कार्यालय स्थापना हुने निर्णय भएपछि स्थानीयवासी खुसी भएका छन् । अब तल्लोसोराड क्षेत्रका नागरिकलाई नागरिकता बनाउन वा नाबालिग सिफारिसका लागि सदरमुकाम सम्म धाउनुपर्ने बाध्यता हट्ने तरुण दल बैतडीका अध्यक्ष महेशदत्त भट्टले बताए ।
सरकारको यो निर्णय सकारात्मक भएको बताउदै उनले यसलाई यथाशीघ्र कार्यान्वयनमा ल्याउनु पर्ने बताए । हाल बैतडीको पुर्चौंडी हाटमा इलाका प्रशासन कार्यालय सञ्चालनमा रहेको छ ।
