मंसिर १८ कञ्चनपुर । महेन्द्रनगरमा निर्माण गरिएको पशु वधशाला प्रयोगविहीन भएको छ । विसं २०७२ सालमा भीमदत्त नगरपालिकाले झन्डै एक करोड १० लाख रुपैयाँको लागतमा महेन्द्रनगरस्थित सब्जीमन्डीमा निर्माण गरिएको वधशाला व्यवसाय मैत्री नहुँदा प्रयोगविहीन भएको हो ।
सब्जीमन्डीमा खसीको व्यवसाय गर्दै आएका मासु व्यवसायी रामसिंह भण्डारीले वधशालामा कुखुरा र खसीका लागि छुट्टाछुट्टै दुई वटा ब्लक निर्माण गरिएको भए पनि वधशालामा काम गर्न असहज भएको बताए् । वधशालामा तीन वर्षपहिले मासु काट्न सुरु गरिए पनि असहज हुँदा काम गर्न नसकिएको उनले बताए ।
व्यवसायीका लागि भवनभित्र कुखुरा, खसी काटेर मासु तयार भएपछि पसलमा लगी बेच्न सक्ने गरी वधशाला निर्माण गरिएको थियो । कुखुरा र खसीको वधशालामा मासु तयार गरिए पनि पसल सम्म पु¥याउन ढुवानीको समेत व्यवस्था नगरिँदा समस्या भएको ब्यावसायीहरुले बताएका छन । निर्माण भएको तीन वर्षपछि वधशाला सञ्चालनमा ल्याइएको थियो । वधशालामा पानी जम्ने, स्थान अभाव लगायतको समस्या हुन थालेपछि प्रयोग गर्न छोडेको व्यवसायीले बताएका छन ।
सब्जीमन्डी व्यवसायी सङ्घका अध्यक्ष विशाल सुनारले आधुनिक प्रविधिबाट निर्माण गरिएको भनिएको वधशाला मासु व्यवसायीका लागि भने उपयुक्त नभएको बताए । मासु व्यवसायीलाई आवश्यक पर्ने स्थान अभाव र फोहोर व्यवस्थापन नहुँदा भाडा तिरेर खर्च मात्रै हुने गरेको उनले बताए ।
मासु व्यवसायीका लागि मासु काट्दा छुट्टै कोठाको व्यवस्था गरिनुपर्ने, पानी निकासको उचित व्यवस्था गरिनु पर्नेमा निर्माण गरिएको संरचना भने आफूहरूका लागि अनुचित भएको उनले जानकारी गराए । भीमदत्त नगरपालिकाले पनि वधशाला सञ्चालनमा ल्याउनका लागि निश्चित मापदण्ड नबनाइँदा समस्या भएको जनाएको छ ।
पालिकाका सूचना अधिकारी हरिसिंह धामीले वधशाला सञ्चालनका लागि व्यवसायीसँग छलफल गरिए पनि व्यवसायीले नरुचाउँदा सञ्चालनमा समस्या भएको बताए । महेन्द्रनगर बजारस्थित चार किल्लालाई मध्यनजर गर्दै निर्माण गरिएको वधशालामा अत्याधुनिक उपकरण समेत जडान गरिएको उनले बताए ।
नगरपालिकाका सबइन्जिनियर पवन लेखकले क्षेत्रीय पशु सेवा निर्देशनालय डोटीले ५० लाख र भेटेरिनरी अस्पताल तथा पशुसेवा विज्ञ केन्द्र, महेन्द्रनगरले २० लाख बराबरको उपकरण जडान गरेको बताउदै हाल ती उपकरणमा समेत खिया लागेर काम नलाग्ने भएको बताए ।
