मंसिर १६ डडेल्धुरा । डडेल्धुरामा एक हजार ८ सय ९२ नयाँ मतदाता थपिएका छन् । निर्वाचन आयोगले गत असोज १० गते देखि १६ वर्ष उमेर पूरा भई नागरिकता प्राप्त व्यक्तिलाई नाम दर्ताका लागि आह्वान गरेसँगै एक हजार ८ सय ९२ नयाँ मतदाता थपिएका हुन ।
जिल्ला निर्वाचन कार्यालयका प्रमुख करुणाकर अवस्थीका अनुसार नयाँ दर्तामध्ये एक हजार २ सय ७२ जनाले अनलाइन प्रणाली मार्फत विवरण भरेर मतदाता परिचयपत्रका लागि आवेदन दिएका छन् । उनका अनुसार ६ सय २० जनाको नाम दर्ता बायोमेट्रिक विवरणका आधारमा गरिएको छ ।
आयोगले प्रतिनिधिसभा निर्वाचनका लागि असोज १० देखि मङ्सिर ५ गतेसम्म मतदाता नामावली सङ्कलन गरेको थियो । यस अवधिमा त्रुटि सच्याउन ७६ जना र नामावली स्थानान्तरणका लागि ३ सय २५ जनाले अनलाइन मार्फत आवेदन दिएको कार्यालयले जनाएको छ ।
डडेल्धुरामा जम्मा ४५ हजार ९ सय ८३ जना महिला र ४५ हजार ९ सय ३६ जना पुरुष मतदाता रहेको जिल्ला निर्वाचन कार्यालयले जनाएको छ ।
आगामी फागुन २१ गते हुने निर्वाचनलाई लक्षित गर्दै मतदानस्थल पुनःव्यवस्थित गर्ने र मतदाता विवरण अद्यावधिक गर्ने काम तीव्रताका साथ जारी रहेको कार्यालय प्रमुख अवस्थीले बताएका छन ।
जिल्लामा चार वटा नयाँ मतदानस्थल थप्न सिफारिस गरिएको बताउदै उनले विक्रम सम्बत २०७९ को निर्वाचनमा १ सय ३९ मतदान केन्द्र र १ सय १ मतदानस्थल रहेकोमा यसपटक एउटा पुरानो मतदानस्थल हटाई चार नयाँ मतदानस्थल थप्ने प्रस्ताव निर्वाचन आयोगमा पठाएको बताए ।
